జగడ్డ: కడపలో మరోసారి భారీగా పట్టుబడిన నగదు, చీరలు..!

ఇప్పుడు మరోసారి జిల్లాలో నగదును, భారీ సంఖ్యలో చీరలను పోలీసులు స్వాధీనం చేసుకున్నారు. వివరాల్లోకి వెళితే..పంచాయతీ ఎన్నికల నేపథ్యంలో కమలాపురానికి సమీపంలో కడప-తాడిపత్రి ప్రధాన రహదారిలో చెక్‌పోస్టు వద్ద మంగళవారం వాహనాల తనిఖీ చేపట్టారు. కడప నకాష్‌వీధికి చెందిన సయ్యద్‌ఉమర్‌ అనే వ్యక్తి ద్విచక్రవాహనంపై నగదుతో కమలాపురానికి బయలుదేరారు. ఇంతలో చెక్‌పోస్టు వద్దకు రాగానే వాహనాన్ని ఆపి తనిఖీ చేయగా అందులో రూ.10 లక్షలు నగదు ఉన్నట్లు గుర్తించి స్థానిక పోలీస్‌స్టేషన్‌కు తరలించి నగదుతో పాటు అతడిని పోలీసులకు అప్పగించారు. నగదుకు సంబంధించి ఎలాంటి బిల్లులు లేకపోవడంతో ఆ వ్యక్తితో పాటు నగదును పోలీస్‌స్టేషన్‌లో అప్పగించామని స్క్వాడ్‌ అధికారులు పేర్కొన్నారు.

ఇకపోతే 45 చీరలను, 60 వేలకు పైగా నగదును పోలీసులు స్వాధీనం చేసుకున్నారు.రాజంపేట మండలం రామాపురం చెక్‌పోస్ట్‌ వద్ద మంగళవారం వాహనాలను తనిఖీ చేస్తుండగా కడప నుంచి ద్విచక్రవాహనంపై చీరలు తరలిస్తున్న పుల్లంపేటకు చెందిన హరిని ఆపి తనిఖీ చేశామన్నారు. అతనివద్ద ఎలాంటి రశీదులు లేకపోవడంతో చీరలను స్వాధీనం చేసుకున్నామన్నారు. మరో ద్విచక్రవాహనంపై వస్తున్న రాజంపేటకు చెందిన నాగూర్‌ను తనిఖీ చేయగా అతని వద్ద రూ.60వేల నగదు లభించిందన్నారు. దానికి ఎలాంటి ఆధారాలు లేకపోవడంతో స్వాధీనం చేసుకున్నట్లు తెలిపారు. వారిద్దరినీ అదుపులోకి తీసుకుని మన్నూరు పోలీసులకు అప్పగించారు. వారిపై కేసు నమోదు చేసినట్లు మన్నూరు ఎస్సై రోషన్‌ వెల్లడించారు. జిల్లాలో మొదటి విడత ఎన్నికలు ముగిశాయి..ఫలితాలు వైసీపీకి అనుకూలంగా వచ్చే సూచనలు కనిపిస్తున్నాయి.. 