38.74 శాతం సీట్లు గెలిచానని చెబుతున్న చంద్రబాబు.. ఎక్కడ గెలిచారు, ఏ ఊరులో గెలిచారో కూడా చెబితే బాగుండేదని మంత్రి బొత్స సవాల్ విసిరారు. చంద్రబాబు మాటలు చూస్తుంటే.. ఆయన గెలిచింది ఆంధ్రప్రదేశ్ లో కాదు, అస్సాంలో ఏమైనా ఆ పార్టీలకు వచ్చిన సీట్లను కలుపుకుని గెలిచారేమో అనిపిస్తుందని మంత్రి బొత్స ఎద్దేవా చేశారు. చంద్రబాబు మాదిరిగా పచ్చ అంకెల గారడీ లెక్కలు మేం చెప్పమని మంత్రి బొత్స వ్యాఖ్యానించారు. ప్రభుత్వం ప‌ట్ల, ముఖ్యమంత్రి వైఎస్ జగన్మోహన్ రెడ్డి నాయ‌క‌త్వం ప‌ట్ల 80 శాతానికి పైగా ప్రజలు మొగ్గు చూపారన్నది ఈ ఎన్నికలు రుజువు చేస్తున్నాయని తెలిపారు. పంచాయతీ ఎన్నికల మొద‌టి విడ‌త‌లో ఇంత గొప్ప విజ‌యాన్ని చేకూర్చినందుకు రాష్ట్ర ప్రజలకు, పార్టీ కార్యకర్తలకు ప్రత్యేక‌మైన కృత‌జ్ఞత‌లు, అభినందనలు తెలిపారు.

* పంచాయితీ తొలి విడత ఎన్నికల్లో వైఎస్సార్ కాంగ్రెస్ పార్టీ గెలుచుకున్న సర్పంచ్ స్థానాలు: 2,637

* తొలి విడతలో మొత్తం 3,244 పంచాయ‌తీల‌కు ఎన్నిక‌లు జ‌రిగితే, ఏక‌గ్రీవాలు కూడా క‌లుపుకుని 2,637 స్థానాలు వైఎస్సార్ కాంగ్రెస్ పార్టీ మద్దతుదారులు, టీడీపీ దాని మిత్రపక్షాల మద్దతుదారులు 508, త‌ట‌స్తులు 99 మంది గెలిచారు. ఇండిపెండెంట్లు గెలిచిన 99లో కూడా అత్యధికులు వైసీపీకి చెందిన రెబ‌ల్స్ ఉన్నారు.