నల్గొండ జిల్లాలోని ఒక్కో గ్రామ పంచాయతీకి రూ.20 లక్షల చొప్పున మంజూరు చేస్తున్నట్లు ప్రకటించిన కేసీఆర్.. జిల్లాలోని లిఫ్ట్ ఇరిగేషన్ ప్రాజెక్టులను ఏడాదిన్నరలో పూర్తి చేస్తామని.. లేదంటే ఓట్లు అడగబోమన్నారు. సీతారామ సాగర్ నుంచి గోదావరి జలాలను తీసుకొచ్చి నల్గొండ జిల్లాలోని సాగర్ ఆయకట్టుకు నీళ్లు అందిస్తామన్నారు. నల్గొండ జిల్లా దామరచర్లలో నిర్మిస్తోన్న 4 వేల మెగావాట్ల థర్మల్ విద్యుత్ కేంద్రం వచ్చే రెండేళ్లలో అందుబాటులోకి వస్తుందన్నారు. దాని కోసం రూ.35 వేల కోట్లు ఖర్చు చేస్తున్నామన్నారు. నాగార్జునసాగర్ నియోజకవర్గ పరిధిలో ఎక్కువగా ఉన్న లంబాడీలు, యాదవుల గురించి కేసీఆర్ ప్రత్యేకంగా ప్రస్తావించారు. తండాలను పంచాయతీలుగా మార్చామన్న గులాబీ బాస్.. యాదవులకు గొర్రె పిల్లలను పంపిణీ చేస్తున్నామన్నారు. నాయీ బ్రాహ్మణులు మోడ్రన్ సెలూన్లు నిర్మించుకునేందుకు లక్ష రూపాయల చొప్పున మంజూరు చేస్తామని హామీ ఇచ్చారు. దళితుల కోసం వచ్చే బడ్జెట్లో సీఎం దళిత్ ఎంపవర్‌మెంట్ పేరిట రూ.1000 కోట్లను కేటాయిస్తామన్నారు. మా ప్రభుత్వం అభివృద్ధి చేసింది... నేను చెప్పే మాటల్లో ఒక్కటి అబద్ధం ఉన్నా నాగార్జునసాగర్ ఉపఎన్నికలో టీఆర్ఎస్‌ను ఓడించండి అంటూ ఆయన ప్రజలకు ఆఫర్ ఇచ్చారు. మంచిగ పని చేస్తున్న మమ్మల్ని పోగొట్టుకుంటే.. నష్టపోయేది మీరే అనే అర్థం ధ్వనించేలా కేసీఆర్ వ్యాఖ్యలున్నాయి. నల్గొండ జిల్లాపై వరాలు గుప్పించడం.. మాట తప్పబోమంటూ ప్రకటించడం.. ఇప్పటి దాకా ఏం చేశాం.. ఇక ముందు ఏమేం చేయబోతున్నామో.. వివరించడం ద్వారా.. నాగార్జునసాగర్ ప్రజలను పూర్తిగా తనవైపు తిప్పుకునేలా కేసీఆర్ మాట్లాడారు.