ఇంటర్నెట్ డెస్క్: శరీరానికి ఏ గాయమైనా.. ఆ గాయం తగ్గాలంటే కచ్చితంగా కుట్లు పడాల్సిందే. అయితే ఒక్క సారి శరీరంపై కుట్లు పడ్డాయంటే.. ఆ మచ్చలు జీవితాంతం అలానే ఉండిపోతాయి. కానీ ఇప్పుడు దానికో పరిష్కారం కనుక్కున్నారు డాక్టర్లు. అదే గాయాలకు గ్లూ వేయడం. మీరు విన్నది నిజమే.. ఇకనుంచి గాయాలను గ్లూతో అతికించబోతున్నారు. ఈ సూపర్ గ్లూ వల్ల గాయాలు, పుండ్లు చాలా త్వరగా మానడమే కాకుండా.. జీవిత కాలం ఆ గాయాల గుర్తులను భరించాల్సి అవసరం కూడా లేదు.

అయితే ఈ గ్లూను అప్లై చేశాక అల్ట్రా వయొలెట్ (యూవీ) కిరణాల సహాయంతో దాన్ని యాక్టివేట్ చేయాలి. అలా యాక్టివేట్ అయ్యాక ఆ గ్లూ పనిచేయడం ప్రారంభిస్తుంది. ఇక దీన్ని ఇప్పటికే పందులు, ఇతర జీవులపై ప్రయోగించి శాస్త్రవేత్తలు సత్ఫాలితాలను కూడా సాధించారు. ఈ క్రమంలోనే త్వరలోనే ఈ సర్జికల్ గ్లూ ను మనుషులపై కూడా క్లినికల్ ట్రయల్స్ జరపనున్నారని తెలుస్తోంది. ఆ తరువాత దీనిని వాణిజ్య పరంగా మార్కెట్‌లోకి తీసుకురానున్నారు. 

ఇక ఈ గ్లూ కు చెందిన ఓ వీడియోను ఆసియాకు చెందిన ప్రముఖ బయో ఫార్మాసూటికల్స్ సంస్థ బయోకాన్ చైర్ పర్సన్ కిరణ్ మజుందార్ షా షేర్ చేశారు. దీంతో ఈ వీడియో ప్రస్తుతం సోషల్ మీడియాలో వైరల్ అవుతోంది. మరి ఈ గ్లూ మార్కెట్లోకి వస్తే ఎంతో మందికి చాలా ఉపయోగపడుతుంది.