ఆస్ట్రేలియాతో చారిత్రక విజయాన్ని సొంతం చేసుకున్న భారత జట్టు ఆ సిరీస్ లో ఎంతో ధైర్యంతో, గొప్పగా పోరాడిందని, ఫలితంగా సిరీస్ కైవసం చేసుకుందని వార్న్ గుర్తు చేశారు. భారత్ ఆడిన తీరు, చూపిన తెగువ అద్భుతమని ప్రశంసించాడు. ఆ సిరీస్ లో ఆస్ట్రేలియా జట్టులో అవి కరువయ్యాయని, ఇప్పుడు ఇంగ్లాండ్ జట్టులోనూ పోరాట పటిమ, గెలవాలనే పట్టుదల కనపడడంలేదని విమర్శించాడు.

మ్యాచ్ లో ఇంగ్లాండ్ జట్టు టీమిండియాను ఫాలో ఆన్ ఎందుకు ఆడించలేదో తనకు అర్ధం కాలేదని వార్న్ అన్నాడు. 'ఫాలో ఆన్ అవకాశం ఉన్నా ఇంగ్లాండ్ ఉపయోగించుకోలేదు. అంతే కాదు రెండో ఇన్నింగ్స్ బ్యాటింగ్‌కు వచ్చినా.. ధాటిగా ఆడి త్వరగా డిక్లేర్ చేయడంపై కూడా ఇంగ్లాండ్ దృష్టి పెట్టలేదు. అసలు మీ టీమ్‌లో ఏం జరుగుతోంది' అంటూ ఆ టీమ్ మాజీ ప్లేయర్ మైకేల్ వాన్‌ను వార్న్ తన ట్వీట్ కు టాగ్ చేశాడు.

ఇదిలా ఉంటే ఇంగ్లాండ్-టీమిండియా మధ్య జరుగుతున్న తొలి టెస్టులో నాలుగు రోజుల ఆట ముగిసింది. ఇంగ్లాండ్ తొలి ఇన్నింగ్స్ లో 578 పరుగుల భారీ స్కోరు చేయగా.. ఇండియా 337 పరుగులు మాత్రమే చేసింది. అయితే రెండో ఇన్నింగ్స్ లో ఇంగ్లాండ్ కేవలం 178 పరుగులకే ఆలౌట్ అయింది. దీంతో భారత్ గెలవాలంటే 420 పరుగుల భారీ లక్ష్యం ఛేదించాలి. నాలుగో రోజు ఆట ముగిసే సమయానికి టీమిండియా 33పరుగులు ఓ వికెట్ కోల్పోయింది. 12 పరుగులు చేసిన రోహిత్ లీచ్ బౌలింగ్ లో పెవిలియన్ చేరాడు.