തിരുവനന്തപുരം
കെഎസ്‌ഇബിയുടെ വൈദ്യുതി സേവനങ്ങൾ വാതിയിൽപ്പടിയിൽ പദ്ധതിയിൽ ആദ്യദിനം രജിസ്‌റ്റർ ചെയ്‌തത്‌ 168 അപേക്ഷ. അപേക്ഷകളുടെ വിവരം ഉപഭോക്തൃ സേവനകേന്ദ്രത്തിൽനിന്ന്‌ സെക്‌ഷനുകളിലേക്ക്‌ കൈമാറി.
ഏറ്റവും കൂടുതൽ രജിസ്‌റ്റർ ചെയ്‌തത്‌ പുതിയ കണക്‌ഷനുള്ള അപേക്ഷകളായിരുന്നു 60 എണ്ണം. ഉടമസ്ഥാവകാശം, മീറ്റർ, പോസ്‌റ്റ്‌, താരിഫ്‌, കണക്ടഡ്‌ ലോഡ്‌ എന്നിവ മാറ്റാൻ യഥാക്രമം 44, 27, 8, 7, 1 അപേക്ഷയും രജിസ്‌റ്റർ ചെയ്‌തു. ഇതിന്‌ പുറമേ മറ്റുസേവനങ്ങൾക്കായി 21 അപേക്ഷയും ലഭിച്ചു. 1912എന്ന ടോൾ ഫ്രീ നമ്പറിൽ വിളിച്ചാൽ പുതിയ വൈദ്യുതി കണക്‌ഷൻ ഉൾപ്പെടെയുള്ള സേവനങ്ങൾ അതിവേഗം ഉപയോക്താവിന്‌ ലഭ്യമാക്കുന്ന പദ്ധതിയാണിത്‌. കഴിഞ്ഞ ദിവസം മുഖ്യമന്ത്രി പിണറായി വിജയനാണിത്‌ ഉദ്‌ഘാടനം ചെയ്‌തത്‌. ആദ്യഘട്ടത്തിൽ സംസ്ഥാനത്തെ 368 സെക്‌ഷനിൽ പദ്ധതി നടപ്പാക്കി.എൽടി ഉപയോക്താക്കളും പുതുതായി എൽടി കണക്‌ഷന്‌ അപേക്ഷിക്കുന്നവരുമാണ്‌ ഗുണഭോക്താക്കൾ. ഉപഭോക്തൃ സേവനകേന്ദ്രത്തിലെ 1912 എന്ന ടോൾ ഫ്രീ നമ്പറിൽ വിളിച്ച്‌ ആവശ്യം അറിയിച്ചാൽ അപേക്ഷ രജിസ്‌റ്റർ ചെയ്യും.
അപേക്ഷയുടെ വിവരം കേന്ദ്രത്തിൽനിന്ന്‌ അതത്‌ സെക്‌ഷൻ ഓഫീസിലേക്ക്‌ കൈമാറും. ഇവിടെയുള്ള ഉദ്യോഗസ്ഥർ സ്ഥലപരിശോധന ഉൾപ്പെടെയുള്ള തുടർനടപടികൾ സ്വീകരിച്ച്‌ സേവനം ലഭ്യമാക്കും. സേവനങ്ങൾക്കായി കെഎസ്‌ഇബി ഓഫീസിൽ കയറിയിറങ്ങേണ്ട, രജിസ്‌റ്റർ ചെയ്യുമ്പോൾ ഫീസാവശ്യമില്ല തുടങ്ങിയ നിരവധി ഗുണങ്ങൾ പദ്ധതിക്കുണ്ട്‌.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
