వాట్సాప్‌ లాంటి యాప్‌ను ఆవిష్కరించే ప్రణాళికలను ప్రభుత్వం గత ఏడాది ధృవీకరించింది. జిమ్స్(జీఐఎంఎస్‌) అనే పేరుతో ఈ ప్రభుత్వ యాప్‌ను లాంచ్‌ చేయనుందని కూడా వార్తలొచ్చాయి. ఇప్పుడు ఆ వార్తలు నిజమయ్యాయి. అయితే పేరు మాత్రం జిమ్స్ కాకుండా.. 'సందేశ్‌' అని మార్చారు. ప్రస్తుతం కొన్ని మంత్రిత్వ శాఖల అధికారులు దీన్ని వాడుతున్నారట. అంతర్గత సమాచార మార్పిడి కోసం కొంతమంది ప్రభుత్వ అధికారులు సందేశ్‌ను ఉపయోగిస్తున్నారట. ఈ విషయాన్ని బిజినెస్ స్టాండర్డ్ సోమవారం ఓ నివేదిక ద్వారా వెలువరించింది. 

ఈ యాప్ లో ఓటీపీ ఆధారిత లాగిన్‌ వంటి సెక్యూరిటీ ఫీచర్స్‌ సహా ఆధునిక చాటింగ్ ఫీచర్లు ఉన్నాయి. ఇవి ఐఓఎస్‌,ఆండ్రాయిడ్‌ ప్లాట్‌ఫాంలు రెండింటిలోనూ వాడుకునేలా తయారు చేస్తున్నారు. ఈ యాప్ కు ఎలక్ట్రానిక్స్ అండ్‌ ఇన్ఫర్మేషన్ టెక్నాలజీ మినిస్ట్రీ పరిధిలోకి వచ్చే నేషనల్ ఇన్ఫర్మేటిక్స్ సెంటర్(ఎన్ఐసీ) పూర్తి స్థాయిలో బ్యాకెండ్ సపోర్ట్ అందిస్తోంది.

మరి ఈ కొత్త చాటింగ్ యాప్ పూర్తి స్థాయిలో ప్రజలకు ఎప్పుడు అందుబాటులోకి తీసుకురానున్నారో కేంద్ర ప్రభుత్వం వెలువరించలేదు. అయితే ఇప్పటికే పబ్ జీకి పోటీగా దేశీ యాప్ ఫవ్ జీ తీసుకొచ్చింది. ఈ గేమ్ కు మంచి స్పందనే వస్తోంది. ఇక ఇప్పుడు వాట్సాప్ కు కూడా పోటీగా దేశీ యాప్ రానుండడంతో దీనిపై అంచనాలు పెరిగిపోతున్నాయి.