శనివారం ఆయన విజయవాడలో నిర్వహించిన కేంద్ర బడ్జెట్ అవగాహన సదస్సులో పాల్గొన్నారు. ఈ సందర్భంగా మంత్రి మీడియాతో మాట్లాడుతూ.. ఏపీలో అమలవుతోన్న ప్రాజెక్టుల్లో విశాఖ-చెన్నై పారిశ్రామిక కారిడార్‌, గ్రీన్‌ ఎనర్జీ కారిడార్‌, పట్టణ నీటిసరఫరా నిర్వహణ మెరుగుదల ప్రాజెక్టు, గ్రామీణ రహదారుల అభివృద్ధి ప్రాజెక్టు ఉన్నాయని అన్నారు. విశాఖ స్టీల్ ప్లాంట్ ప్రైవేటీకరణ నిర్ణయాన్ని ప్రజలు వ్యతిరేకిస్తూ ఆందోళన చేస్తున్నారు కదా? దానిపై స్పందన తెలియజేయమనగా..... ‘ఇది మంత్రి ధర్మేంద్ర ప్రధాన్‌ సమాధానం చెప్పాల్సిన ప్రశ్న. కేంద్ర ప్రభుత్వం తీసుకున్న నిర్ణయమైనా ప్రజల సంక్షేమం, ఉపాధి అంశాల్ని దృష్టిలో పెట్టుకుని తీసుకుంటుంది’ అని వ్యాఖ్యానించారు. కరోనా లాక్‌డౌన్ సమయంలో వివిధ దేశాల నుంచి 2.9 లక్షల మంది తెలుగువారిని స్వదేశానికి తీసుకువచ్చామన్నారు. నేను వివిధ దేశాల్లో పర్యటించానని, తెలుగువారు లేని దేశాన్ని ఎక్కడా చూడలేదని పేర్కొన్నారు. ప్రతిభావంతుల్ని అందిస్తున్న ఈ గడ్డను సందర్శించాలని ఎప్పటి నుంచో ఎదురు చూస్తున్నాను అని, అది ఈ రోజు నెరవేరిందని జైశంకర్‌ అన్నారు. బడ్జెట్‌లో ఆత్మనిర్భర్‌ భారత్‌... స్పష్టంగా కనిపిస్తోందని జైశంకర్‌ వెల్లడించారు. కోవిడ్-19 సంక్షోభం ఉన్నప్పటికీ భారత ఆర్థిక వ్యవస్థ సుమారు 11% వృద్ధి సాధించనుందని విశ్వాసం వ్యక్తం చేశారు. ‘డిమాండ్ తిరిగి పుంజుకోవడమే కాదు.. 2021-22 ఆర్థిక సంవత్సరానికి రిజర్వ్ బ్యాంక్ ఆఫ్ ఇండియా ద్రవ్య విధానం ప్రకారం కోవిడ్ అనంతర కాలంలో కొత్త వృద్ధికి అవకాశం ఉంది’ అని మంత్రి పేర్కొన్నారు.