ఎన్నికల కమిషనర్ నిమ్మగడ్డ రమేష్ కుమార్ ను కలసి ఫిర్యాదు లేఖ అందించారు వైసీపీ ప్రధాన కార్యదర్శి లేళ్ల అప్పిరెడ్డి. పంచాయతీ ఎన్నికలకు మేనిఫెస్టో ప్రకటించిన చంద్రబాబుపై వెంటనే కేసులు నమోదు చేయాలని ఫిర్యాదు చేసారు. ఈ సందర్భంగా ఆయన మీడియా తో మాట్లాడుతూ... తెదేపా అధినేత చంద్రబాబు మేనిఫెస్టో విడుదల చేసినందున చర్యలు తీసుకోవాలని మేము కోరాం అని ఆయన అన్నారు. విచారించిన ఎస్ఈసీ తెదేపా మేనిఫెస్టోను మాత్రమే రద్దు చేశారు అని ఆయన ఆరోపించారు. 

ఎన్నికల నియమావళిని చంద్రబాబు ఉల్లంఘించారని ఎస్ఈసీ దృష్టికి తెచ్చాం అని ఆయన వెల్లడించారు. మేనిఫెస్టో రద్దు చేసి కేవలం తూతూ మంత్రంగా ఎస్ఈసీ చర్యలు తీసుకున్నారు అని ఆయన ఆరోపించారు. చంద్రబాబుపై వెంటనే కేసు నమోదు చేయాలని ఎస్ఈసీని కోరాం అని ఆయన వెల్లడించారు. చిత్తూరు, గుంటూరు జిల్లాల్లో ఏకగ్రీవాలను నిలిపివేయాలని ఎస్ఈసీ నిర్ణయం తీసుకోవడాన్ని వ్యతిరేకిస్తున్నాం అని ఆయన తెలిపారు. చంద్రబాబు కళ్లల్లో ఆనందం చుసేందుకు నిమ్మగడ్డ రమేష్ కుమార్ ప్రయత్నిస్తున్నారు అని అన్నారు. ఇక ఇదిలా ఉంటే నిమ్మగడ్డ రమేష్ కుమార్ పై కేంద్ర ఎన్నికల కమీషనర్ కి ఫిర్యాదు చేసే ఆలోచనలో అధికార పార్టీ ఉంది.