చెన్నై: '5 కోట్లిస్తారా.. ప్రధాని మోదీని చంపేస్తా..' అంటూ సోషల్ మీడియాలో పోస్ట్ చేసిన ఓ వ్యక్తిని పోలీసులు అరెస్టు చేశారు. ప్రధానిని అవమానిస్తూ పోస్టులు పెట్టడం వల్లే ఆ వ్యక్తిని అదుపులోకి తీసుకున్నట్లు పోలీసులు చెప్పారు. పుదుచ్చేరిలోని అరియన్‌కుప్పం గ్రామంలో ఈ ఘటన చోటు చేసుకుంది. 

పాపులారిటీ కోసం, ఒక్కసారిగా గుర్తింపు తెచుకోడం కోసం ఈ మధ్య కాలంలో ఇలాంటి పోస్టులు ఎక్కువయ్యాయి. ముఖ్యంగా సెలెబ్రిటీలను టార్గెట్ చేస్తూ కొంతమంది ఇలాంటి పోస్టులు పెడుతున్నారు. ఈ క్రమంలొనే ఓ వ్యక్తి ఎకంగా ప్రధానినే టార్గెట్ చేశాడు. చివరికి పోలీసుల చేతికి చిక్కి జైల్లో ఊచలు లెక్కబెడుతున్నాడు.

వివరాల్లోకి వెళితే.. పుదుచ్చేరిలోని అరియన్‌కుప్పం గ్రామంలోని మణ్‌వెళి ప్రాంతంలో సత్యానందంగా (43) అనే రియల్‌ ఎస్టేట్‌ వ్యాపారి ఉంటున్నాడు. అతడు ఎప్పుడూ బీజేపీకి వ్యతిరేకంగా, మోదీకి వ్యతిరేకంగా పోస్టులు పెడుతూ ఉంటాడు. ఈ నేపథ్యంలోనే ఈ మధ్య ‘ఎవరైనా నాకు రూ.5 కోట్లు ఇస్తే ప్రధాని మోదీని చంపేందుకు నేను సిద్ధంగా ఉన్నా. రూ.5 కోట్లు ఇచ్చేందుకు ఎవరైనా సిద్ధంగా ఉన్నారా?’ అని అతడు తన ఫేస్‌బుక్‌ ఖాతాలో పోస్టు చేశాడు. 

ఈ కేసుకు సంబంధించిన వివరాలను పోలీసులు వెల్లడించారు. రూ.5 కోట్లిస్తే మోదీని చంపుతానని 43ఏళ్ల సత్యానంద పోస్టు చేశాడని, దానిపై తమకు ఫిర్యాదు రావడంతో దర్యాప్తు చేసి అతడిని అదుపులోకి తీసుకున్నామని చెప్పారు. సత్యానంద రియల్ ఎస్టేట్ వ్యాపారం చేస్తున్నాడని, అతడి ఇతర పోస్టులపై కూడా దృష్టి సారించామని పోలీసులు తెలిపారు. అరెస్టు చేసిన అనంతరం సత్యానందను గురువారం స్థానిక కోర్టులో హాజరుపరిచామని తెలిపారు.