అమరావతి: విశాఖ స్టీల్ ప్లాంట్ ప్రైవేటీకరణపై దేశ వ్యాప్తంగా వ్యతిరేకత వస్తోంది. ముఖ్యంగా ఆంధ్రప్రదేశ్ లో ఆందోళనలు తీవ్రతరమవుతున్నాయి. ఈ నేపథ్యంలోనే కేంద్రం తీరుపై అనేకమంది నేతలు ఆగ్రహం వ్యక్తం చేస్తున్నారు. ఈ క్రమంలోనే టీడీపీ ఎమ్మెల్యే గంటా శ్రీనివాస్ ఈ నిర్ణయం తీసుకున్నారు. ప్రస్తుతం ఈ వార్త సంచలనంగా మారింది. అంతే కాదు తన రాజీనామా లేఖను ఆయనే స్వయంగా స్పీఎకర్ కు అందజేశారు. స్టీల్ ప్లాంట్ ప్రైవేటైజేషన్‌కు సంబంధించి కేంద్రం నిర్ణయం అమలులోకి రాగానే తన రాజీనామాను ఆమోదించాలని అసెంబ్లీ స్పీకర్‌ను గంటా కోరారు.

     

ఇదిలా ఉంటే ఆంధ్రప్రదేశ్ లో విశాఖ స్టీల్ ప్లాంట్‌ను 100 శాతం ప్రైవేటీకరించేందుకు కేంద్ర ప్రభుత్వం ఈ మధ్యనే గ్రీన్ సిగ్నల్ ఇచ్చింది. ‘విశాఖ ఉక్కు ఆంధ్రుల హక్కు’ పేరుతో పోరాడి సాధించుకున్న విశాఖ ఉక్కు కర్మాగారాన్ని కేంద్రం ప్రైవేటీకరించేందుకు ముందుకు వచ్చినా రాష్ట్ర ప్రభుత్వం నుంచి ఎలాంటి స్పందన రాలేదు. అటు కేంద్రం, ఇటు రాష్ట్ర ప్రభుత్వ వైఖరిని తప్పుపడుతూ ప్రతిపక్షాలు, విశాఖ స్టీల్ ప్లాంట్ కార్మిక యూనియన్లు, ప్రజలు పోరాటానికి సిద్ధమవుతున్నాయి. ఇప్పటికే నిరసనలు తెలుపుతున్నారు. దీనికి తోడు ప్రస్తుతం ఏకంగా స్థానిక ఎమ్మెల్యే కూడా రాజీనామా చేయడం ప్రాధాన్యం సంతరించుకుంది. మరి దీనిపై కేంద్రం ఎలా స్పందిస్తుందో వేచి చూడాలి.