ఇక పవన్ కళ్యాణ్ మద్దతు ప్రకటించడం, బిజెపి మేము పోరాటం చేస్తామని చెప్పడం వంటివి హాట్ టాపిక్ అయ్యాయి. ఈ నేపధ్యంలో జనసేన పార్టీ కీలక నేత జనసేన పిఎసి కమిటీ ఛైర్మన్ నాదెండ్ల మనోహర్ మీడియాతో మాట్లాడారు. ఉక్కు కర్మాగారాన్ని కాపాడుకోవడానికి జనసేన కృషి చేస్తుంది అని ఆయన వెల్లడించారు. విశాఖ ఉక్కు కర్మాగారం... తెలుగువారి ఆత్మగౌరవానికి, ఆకాంక్షలకు ప్రతీక అని ఈ సందర్భంగా పేర్కొన్నారు. ఇటువంటి ప్రతిష్ఠాత్మక ప్రాజెక్టు నుంచి పెట్టుబడుల ఉపసంహరణ బాధాకరం అని ఆయన ఆరోపించారు. 

22 వేల ఎకరాల్లో విస్తరించి 17 వేల మంది పర్మినెంట్, 16 వేల మంది కాంట్రాక్టు ఉద్యోగులుతో కంపెనీ ఉందని ఆయన తెలిపారు. లక్షమందికి ప్రత్యక్షంగా, పరోక్షంగా ఉపాధిని కల్పిస్తున్న ఉక్కు ప్లాంటు అని వెల్లడించారు. ఎందరో త్యాగాల ఫలితంగా ఆవిర్భవించిన ఈ కర్మాగారం అని అన్నారు. చేతులు మారుతుందంటే తెలుగువారందరికీ ఆమోదయోగ్యం కాదు అని, ఉక్కు కర్మాగారాన్ని ఇప్పటి పరిస్థితుల నుంచి కాపాడుకోవడానికి జనసేన పార్టీ తనవంతు కృషి చేస్తుంది అని తెలిపారు. కేంద్రం తన ప్రతిపాదనను ఉపసంహరించుకోవాలని మోడీ, అమిత్ షా, నడ్డాలను పవన్ కళ్యాణ్ త్వరలో కలుస్తారు అని తెలిపారు. కాగా పత్రికా ప్రకటనను నాదెండ్ల విడుదల చేసిన సంగతి తెలిసిందే.