ന്യൂഡൽഹി
കർഷകപ്രതിഷേധം തടയാൻ ഡൽഹി പൊലീസ്‌ സ്വീകരിച്ചിരിക്കുന്ന മനുഷ്യത്വഹീനമായ ഉപരോധനടപടികൾ പിൻവലിക്കണമെന്ന്‌ സിപിഐ എം പൊളിറ്റ്‌ബ്യൂറോ ആവശ്യപ്പെട്ടു. കാർഷികനിയമങ്ങൾ പിൻവലിക്കണമെന്ന്‌ ആവശ്യപ്പെട്ട്‌ നടക്കുന്ന ധീരമായ പോരാട്ടത്തിൽ പങ്കെടുക്കാൻ വിവിധ സംസ്ഥാനങ്ങളിൽനിന്ന്‌ എത്തുന്നവർക്ക്‌ വെള്ളവും ഭക്ഷണവും ഇതര അവശ്യവസ്‌തുക്കളും ലഭ്യമാക്കുന്നത്‌ തടയുന്ന ഡൽഹി പൊലീസിന്റെ നടപടി അപലപനീയമാണ്‌.
ഡൽഹി സർക്കാരിന്റെ നിയന്ത്രണത്തിലുള്ള ജലബോർഡ്‌ ടാങ്കറുകളിൽ കർഷകർക്ക്‌ വെള്ളം എത്തിക്കുന്നത്‌ പൊലീസ്‌ തടഞ്ഞു. കക്കൂസുകൾ അടക്കം ഡൽഹി സർക്കാർ ഏർപ്പെടുത്തിയ സംവിധാനങ്ങളും ഡൽഹി പൊലീസ്‌ ബലമായി ഒഴിപ്പിച്ചു. തെരഞ്ഞെടുക്കപ്പെട്ട ഡൽഹിസർക്കാരിനെ കടമ നിർവഹിക്കുന്നതിൽനിന്ന്‌ തടയുന്നത്‌ നിയമവിരുദ്ധമാണ്‌.
കർഷകരെ പട്ടിണിക്കിട്ട്‌ സമരത്തിൽനിന്ന്‌ പിന്തിരിപ്പിക്കാമെന്ന ധാരണയിലാണ്‌ കേന്ദ്രആഭ്യന്തരമന്ത്രാലയത്തിന്റെ കീഴിലുള്ള ഡൽഹി പൊലീസിന്റെ നടപടികൾ. കർഷകരുടെ നിശ്‌ചയദാർഢ്യത്തിനുമുന്നിൽ ഇതൊന്നും വിജയിക്കില്ല. കൂടുതൽ കൂടുതൽ കർഷകർ പ്രക്ഷോഭത്തിൽ അണിചേരുകയാണ്‌. ഹീനമായ നടപടികളിൽനിന്ന്‌ പിന്തിരിയാൻ ഡൽഹി പൊലീസിന്‌ കേന്ദ്രസർക്കാർ നിർദേശം നൽകണമെന്ന്‌ പിബി ആവശ്യപ്പെട്ടു.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
