തിരുവനന്തപുരം > മുഖ്യമന്ത്രി പിണറായി വിജയനെ അധിക്ഷേപിച്ച്‌ സംസാരിച്ച സംഭവത്തിൽ കെ സുധാകരനോടുള്ള നിലപാട്‌ കോൺഗ്രസ്‌ നേതൃത്വം വ്യക്തമാക്കണമെന്ന്‌ സിപിഐ എം സംസ്ഥാന സെക്രട്ടറിയുടെ ചുമതലയുള്ള എ വിജയരാഘവൻ ആവശ്യപ്പെട്ടു. സാംസ്‌കാരിക കേരളത്തിന്‌ അപമാനകരമായ പരാമർശങ്ങളാണ്‌ കെ സുധാകരൻ നിരന്തരം നടത്തുന്നത്‌.
കോൺഗ്രസ്‌ ജാഥയിൽ മുഖ്യമന്ത്രിയെ വ്യക്തിഹത്യ നടത്തുകയാണ്‌. പാർലമെന്റംഗം കൂടിയാണ്‌ അത്യന്തം ഹീനമായ പ്രസ്‌താവന നടത്തിയിരിക്കുന്നത്‌. ആധുനിക സമൂഹത്തിൽ സാധാരണ ഉപയോഗിക്കാത്ത രീതിശാസ്‌ത്രമാണ്‌ സുധാകരൻ സ്വീകരിച്ചത്‌. ഈ നിലപാടിനോട്‌ കോൺഗ്രസ്‌ പാർടി അവരുടെ നിലപാട്‌ വ്യക്തമാക്കേണ്ടതുണ്ട്‌. നമ്മുടെ സംസ്ഥാനത്തിന്റെ മുഖ്യമന്ത്രിയെ അധിക്ഷേപിക്കാൻ ഈ പരിഷ്‌കൃത കാലത്ത്‌ ഇത്തരം വാക്കുകൾ ഉപയോഗപ്പെടുത്തിയത്‌ അപലപിക്കേണ്ട ഒന്നാണ്‌.
കേരളം കടന്നുപോന്ന കാലത്തിന്റെ വഴികളെക്കുറിച്ചുള്ള ബോധക്കുറവ്‌ കൊണ്ടാണ്‌ സുധാകരൻ ഇങ്ങനെ സംസാരിക്കുന്നത്‌. ബാക്കിയുള്ളവർ ഇതിൽ ഉറച്ച്‌ നിൽക്കുന്നുണ്ടോ എന്നാണ്‌ അറിയേണ്ടത്‌ - വിജയരാഘവൻ പറഞ്ഞു.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
