ఇండియా హెరాల్డ్ అందిస్తున్న ఈ ఆర్టికల్ చదవండి..

హైదరాబాద్: పుట్టింటిపై ఉండే ప్రేమ అత్తింటిపై ఉండదని నానుడి. ఈరోజు ప్రవేశ పెట్టిన కేంద్ర బడ్జెట్‌లో (2021-22) ఆ విషయం స్పష్టంగా కనిపించింది. స్వరాష్ట్రం తమిళనాడుకు భారీగా కేటాయింపులు చేసిన కేంద్ర ఆర్థిక మంత్రి నిర్మలా సీతారామన్.. మెట్టినిళ్లు తెలుగు నేలకు మొండి చేయి చూపించారు. నిధులు మాట అటుంచితే బడ్జెట్ ప్రసంగంలో కనీసం తెలుగు రాష్ట్రాల పేరు పెద్దగా ప్రస్తావించలేదు.

మోదీ ప్రభుత్వంలో కేంద్ర ఆర్థిక మంత్రిగా నిర్మలా సీతారామన్ చేరినప్పటి నుంచి, తెలుగింటి కోడలిగా ఆమెపై తెలుగు వారికి అనేక ఆశలు ఉన్నాయి. ఈ ఏడాది కాకపోయినా వచ్చే ఏడాదైనా తెలుగు రాష్ట్రాలకు భారీగానే నిధులు వస్తాయని అనుకున్న వారికి భంగపాటు తప్పడం లేదు.

నేటితో వరుసగా మూడవసారి బడ్జెట్ ప్రవేశపెట్టిన నిర్మలా.. ఏపీకి తెలంగాణకు కేటాయింపుల విషయంలో మరోసారి ముఖం చాటేశారు. తమిళనాడు సహా దక్షిణాదిలోని కేరళ, కర్ణాటక రాష్ట్రాలకు వివిధ అభివృద్ధి పనుల కింద బాగానే కేటాయించారు. మెట్రో రైలు, జాతీయ రహదారులు ప్రాజెక్టులు భారీ స్థాయిలోనే ప్రకటించారు.

చెన్నై మెట్రో రైలు విస్తరణకు రూ.63, 246 కోట్లు కేటాయించారు. అలాగే బెంగళూరు మెట్రోకు రూ.14,788 కోట్లు కేటాయించారు. ఇక కేరళ, తమిళనాడు రాష్ట్రాల్లో పెద్ద ఎత్తున జాతీయ రహదారులను నిర్మించేందుకు బడ్జెట్‌లో ప్రతిపాదనలు చేశారు. కానీ ఈ కేటాయింపులేవీ తెలుగు రాష్ట్రాల వరకు రాకపోవడం బాధాకరం. నిర్మలా బడ్జెట్‌పై తెలుగు నెటిజెన్లు ట్రోల్స్ చేస్తున్నారు. బడ్జెట్ ప్రసంగం అనంతరం ''పుట్టింటి మీద ప్రేమ.. అత్తింటి మీద అలక'' అంటూ నిర్మలాపై నెటిజెన్లు జోకులు వేస్తున్నారు.

ఇలాంటి మరెన్నో ఆసక్తికరమైన విషయాలు కోసం ఇండియా హెరాల్డ్ గ్రూప్ ని ఫాలో అవ్వండి. ఇంకా మరెన్నో విషయాలు తెలుసుకోండి.