ఇక అలాగే ఈ మే నెలలో అన్నీ సూపర్ హిట్లే కాకుండా.. కొన్ని ఫ్లాపులు కూడా ఉన్నాయి. ‘ఖైదీ’ సినిమాతో స్టార్ హీరో హోదాను సంపాదించిన చిరంజీవి.. ఆ తరవాత చాలా తక్కువ సినిమాలను మే నెలలో ప్రేక్షకుల ముందుకు తీసుకువచ్చారు. వాటిలో చిరంజీవి 86వ చిత్రం ‘వేట’ 1986 మే 28న విడుదలైంది. కానీ, ఈ సినిమా బాక్సాఫీస్ వద్ద డిజాస్టర్ అయ్యింది. ఆ తరవాత మళ్లీ 1990 మే 9న ‘జగదేకవీరుడు అతిలోకసుందరి’ విడుదలైంది. బ్లాక్ బస్టర్ హిట్ అయ్యింది. ‘వేట’, ‘జగదేకవీరుడు అతిలోకసుందరి’కి మధ్య 22 సినిమాలు వచ్చాయి. కానీ, ఏ సినిమా కూడా మే నెలలో విడుదల కాలేదు. ఇక ‘జగదేకవీరుడు అతిలోకసుందరి’ విడుదలైన తరవాత సంవత్సరమే అంటే 1991 మే 9న ‘గ్యాంగ్ లీడర్’ సినిమా ప్రేక్షకుల ముందుకు వచ్చింది. ఈ సినిమా ఎంత పెద్ద విజయం సాధించిందో ప్రత్యేకంగా చెప్పాల్సిన అవసరం లేదు. ఇదో ట్రెండ్ సెట్టర్. ఇండస్ట్రీలో సరికొత్త రికార్డులను సృష్టించింది. ‘గ్యాంగ్ లీడర్’ తరవాత మళ్లీ మే నెలలో విడుదలైన సినిమా ‘మెకానిక్ అల్లుడు’. బి.గోపాల్ దర్శకత్వంలో రూపొందిన ఈ సినిమా 1993 మే 27న విడుదలైంది. చిరంజీవి, అక్కినేని నాగేశ్వరరావు కలిసి నటించిన ఈ సినిమా ఆశించిన స్థాయిలో ఆడలేదు. బాక్సాఫీస్ వద్ద మరొక డిజాస్టర్ గా మిగిలింది. ఇక ఈ సినిమా తరవాత చిరంజీవి సినిమా ఏదీ కూడా మే నెలలో రాలేదు. అలాంటిది ఇప్పుడు సుమారు 28 ఏళ్ల తర్వాత మళ్లీ ‘ఆచార్య’ రూపంలో చిరంజీవి సినిమా మే నెలలో వస్తోంది. మే 13 గురువారం వచ్చింది. ‘గ్యాంగ్ లీడర్’ కూడా గురువారం నాడే విడులైందట. అంతేకాదు, మే 13న రోహిణి నక్షత్రమని..‌ అది శుభ ఫలితాలనిచ్చే చాలా మంచి నక్షత్రంగా చెబుతున్నారు. ఇక ఇవన్నీ ‘ఆచార్య’కు బాగా కలిసొస్తాయని చర్చ నడుస్తుంది. అలాగే ఇక వీటికి తోడు మే 13న రంజాన్ కూడా వచ్చే అవకాశం ఉందంటున్నారు. మరి ఇన్ని ప్రత్యేకతలు ఉండబట్టే మెగాస్టార్ చిరంజీవి ‘ఆచార్య’ సినిమాకు మే నెలలో ముహూర్తం పెట్టారు.