అయితే గత ఏడాదే ఏకగ్రీవాలు అయిన పంచాయతీలకు నజరానా ఇవ్వనున్నట్లు ప్రభుత్వం ప్రకటించిన విషయం తెలిసిందే. అయితే ఈ సారి 2 వేల లోపు జనాభా ఉన్న పంచాయతీలకు రూ. 5 లక్షల ప్రోత్సాహకం అందిస్తామని వెల్లడించింది. 2 వేల నుంచి 5 వేల లోపు జనాభా ఉన్న పంచాయతీలకు రూ.10 లక్షలు, అలాగే 5 వేల నుంచి 10 వేల లోపు జనాభా ఉన్న పంచాయతీలకు రూ. 15 లక్షలు ఇవ్వనున్నట్లు తెలిపింది. ఇక 10 వేలకు పైగా జనాభా ఉన్న పంచాయతీలకు రూ.20 లక్షల ప్రోత్సాహకం అందించనున్నట్లు పేర్కొంది. ఇక ఇప్పుడు ప్రస్తుత పంచాయతీ ఎన్నికల నేపథ్యంలో ఈ ప్రోత్సాహకాలకు విస్తృతంగా ప్రచారం కల్పించాలని రాష్ట్ర ప్రభుత్వ ప్రధాన కార్యదర్శి ఆదిత్య నాథ్ దాస్ అధికార యంత్రాంగానికి ఆదేశాలు జారీ చేశారు. గ్రామాల్లో ఎలాంటి ఎన్నిక జరగకుండా ప్రజలంతా ఒక్క మాటపై నిలబడి సర్పంచ్, వార్డు సభ్యులను ఎన్నుకోవడాన్నే ఏకగ్రీవం అంటారు. ఆవిధంగా ఊరి ప్రజలంతా చర్చించుకుని.. ఒకే అభిప్రాయానికి వచ్చి తమ గ్రామ నాయత్వాన్ని ఎన్నుకోవడమే ఏకగ్రీవానికి అర్ధం. ఇక ఈ ఏకగ్రీవాల వల్ల ప్రభుత్వానికి ఎన్నికల నిర్వహణకు అయ్యే ఖర్చులు, ప్రచారానికి చేసే ఖర్చులు ఉండవు. మరీ ముఖ్యంగా గ్రామాల్లో ఎన్నికల సందర్భంగా వివిధ రకాల గొడవలు చెలరేగే అవకాశం ఉంటుంది కాబట్టి.. ఈ రకమైన ఏకగ్రీవాల వల్ల అలాంటి ప్రమాదకర సంఘటనలు జరగకుండా ఉండేందుకు ఆస్కారం ఉంటుంది అని పలువురు తమ అభిప్రాయాలను వ్యక్తం చేస్తున్నారు.