రాష్ట్రంలోని ఇంటర్మీడియట్ కాలేజీలకు వేసవి సెలవులను రద్దు చేస్తూ జగన్ సర్కార్ కీలక ఆదేశాలు జారీ చేసింది. అదే విధంగా పదో తరగతి విద్యార్థులకు సోమవారం నుంచి రెండు పూటలా తరగతులు నిర్వహించాల్సిందిగా ఆదేశించింది. వీరికోసం ప్రత్యేకంగా 103 రోజుల కార్యాచరణ ప్రణాళికను కూడా రూపొందించినట్లు తెలుస్తోంది.

సాధారణంగా 10వ తరగతి విద్యార్థులకు సబ్జెక్టులతో కలిపి ప్రతి రోజూ 8 పీరియడ్లు జరుగుతాయి. ఉదయం 8.45 నుంచి సాయంత్రం 4.20గంటల వరకూ ఈ తరగతులు నిర్వహిస్తారు. జాతీయ, ఇతర పండుగలు మినహా ఆదివారాల్లో కూడా తరగతులు నిర్వహిస్తారు. ఆదివారం ఒక సబ్జెక్టులో మాత్రమే తరగతులు జరుగుతాయి. 

అన్ని పాఠశాలల్లో సోమవారం నుంచి ఈ ప్రణాళికను అమలు చేయాలని డీఈవో సుబ్బారావు తాజాగా ఆదేశాలు జారీ చేశారు. ఇంటర్‌ ప్రథమ సంవత్సర తరగతులు కూడా సోమవారం నుంచే ప్రారంభం కానున్నట్లు ఆయన ప్రకటించారు. దీనికి సంబంధించి సవరించిన వార్షిక క్యాలెండర్‌ను సైతం ఇంటర్‌ బోర్డు వెలువరించింది. దాని ప్రకారం ఇంటర్మీడియెట్‌కు మొత్తం 106 పని దినాలు ఉంటాయి. మే 31 వరకూ తరగతులు జరుగుతాయి. రెండో శనివారం కూడా కళాశాలలు నిర్వహించనున్నారు. వేసవి సెలవులను కూడా రద్దు చేయడం జరిగింది. 

ఇక ఇంటర్మీడియట్‌ ద్వితీయ సంవత్సరం విద్యార్థులకు వచ్చే ఏడాది అంటే 2021-22 విద్యా సంవత్సరం జూన్‌ 3వ తేదీ నుంచి ప్రారంభం కానుంది. ఇదిలా ఉంటే ప్రాథమికోన్నత, ఉన్నత పాఠశాలల్లో కూడా సోమవారం నుంచి ఆరో తరగతి క్లాసులు ప్రారంభిస్తున్నట్లు డీఈవో సుబ్బారావు వెల్లడించారు. వీరికి రోజుమార్చి రోజు తరగతులు జరుగుతాయని తెలిపారు.