బోర్డర్-గవాస్కర్ ట్రోఫీ మూడో టెస్టులో భాగంగా శని, ఆదివారం రోజున బౌండరీ లైన్‌ వద్ద ఫీల్డింగ్‌ చేస్తున్న భారత పేసర్ మహ్మద్ సిరాజ్‌పై పలువురు ఆస్ట్రేలియా ప్రేక్షకులు జాత్యహంకార వ్యాఖ్యలు చేశారు. దీనిపై సర్వత్రా విమర్శలు వచ్చాయి. ఇక ఘటనపై బీసీసీఐ ఐసీసీకి ఫిర్యాదు కూడా చేసింది.ఇది ఇలా ఉండగా ఆస్ట్రేలియా ప్రేక్షకులు జాత్యహంకార వ్యాఖ్యలు చేయడంపై ఆ దేశ ఆటగాడు డేవిడ్ వార్నర్ స్పందించాడు. టీమిండియాతో పాటు, సిరాజ్‌కు వార్నర్ మంగళవారం క్షమాపణలు చెప్పాడు. ఎక్కడైనా, ఎప్పుడైనా జాతి వివక్ష, దుర్భాషలాడటం ఆమోదించదగినవి కాదని పేర్కొన్నాడు. ఇకపై తమ ప్రేక్షకుల నుంచి ఇలాంటివి చోటు చేసుకోవద్దని ఆశిస్తున్నట్లు చెప్పాడు.

కాగా డేవిడ్ వార్నర్ ఇండియన్ ప్రీమియర్ లీగ్ లో సన్ జర్స్ హైదరాబాద్ జట్టుకు కెప్టెన్ గా వ్యవహరిస్తున్న సంగతి తెలిసిందే. ఈ క్రమంలోనే వార్నర్ తెలుగు ప్రేక్షకులకు మరింత దగ్గరయ్యాడు. ఇక లాక్ డౌన్ సమయంలో వార్నర్  తెలుగు పాటలకు టిక్ టాక్ వీడియోలు చేయడం అతన్ని తెలుగు అభిమానులకు మరింత చేరువ చేసిందనే చెప్పవచ్చు.