ప్రపంచవ్యాప్తంగా ఇప్పటివరకు కేవలం 2.5 కోట్ల మంది మాత్రమే టీకా తీసుకోగలిగారని ప్రధాని మోదీ అన్నారు. జులై నాటికి దేశంలో 30 కోట్ల మందికి వ్యాక్సిన్ ఇవ్వాలని లక్ష్యంగా పెట్టుకున్నట్లు ఆయన తెలిపారు. వ్యాక్సిన్లపై వదంతులు వ్యాపించకుండా రాష్ట్రాలు చర్యలు తీసుకోవాలని మోదీ సూచించారు. సైంటిస్టుల సలహాలు, నిపుణుల సూచనలు తీసుకున్న తర్వాతే టీకాలపై నిర్ణయం తీసుకున్నామని వివరించారు. వ్యాక్సిన్‌ పంపిణీ ప్రక్రియ ప్రారంభం కానున్న నేపథ్యంలో సోమవారం (జనవరి 11) అన్ని రాష్ట్రాల ముఖ్యమంత్రులతో ప్రధాని మోదీ సమావేశమయ్యారు. వర్చువల్ ద్వారా జరిగిన ఈ భేటీలో వ్యాక్సిన్ పంపిణీ ఏర్పాట్లు, సన్నద్ధతపై సీఎంలతో చర్చించారు. తొలి దశ టీకాల పంపిణీ తర్వాత ముఖ్యమంత్రులతో మరోసారి భేటీ అవుతానని ప్రధాని చెప్పారు. తదుపరి కార్యాచరణపై ఆ సమావేశంలో చర్చిద్దామని అన్నారు.