దేశ ప్రజలు ఎప్పుడెప్పుడా అని ఎదురుచూస్తున్న కరోనా వ్యాక్సిన్ అతి త్వరలోనే అందుబాటులోకి రానుంది. ఇప్పటికే కరోనా వ్యాక్సిన్ సరఫరా కోసం కేంద్ర ప్రభుత్వం ముమ్మర చర్యలు చేపట్టింది. ఇక జనవరి 16 నుంచి కరోనా వ్యాక్సిన్ అందించనున్నట్లు శనివారం కేంద్రం వెల్లడించింది. కాగా భారత్‌ బయోటెక్‌ అభివృద్ధి చేసిన కొవాగ్జిన్‌తో పాటు ఆక్స్‌ఫర్ట్‌-ఆస్ట్రాజెనెకా సంయుక్తంగా అభివృద్ధి చేసిన కొవిషీల్డ్ వ్యాక్సిన్‌కు  భారత ఔషధ నియంత్రణ మండలి ఆమోద ముద్ర వేసిన విషయం తెల్సిందే. ముందుగా దాదాపు మూడు కోట్ల మంది ఆరోగ్య కార్యకర్తలు, ఫ్రంట్‌లైన్‌ వారియర్స్ కు టీకా ఇవ్వనున్నట్లు తెలిపింది.  తర్వాత  50 ఏళ్ల పైబడిన లేదా ఇతర వ్యాధులతో బాధపడుతున్న 50ఏళ్ల లోపు వారికి మొత్తం 27 కోట్ల మంది అందించనున్నట్లు వెల్లడించింది.

కరోనా వ్యాక్సిన్ పంపిణీలో భాగంగా కేంద్రం ఆదేశాల మేరకు రాష్ట్ర ప్రభుత్వాలు ఏర్పాట్లను చేస్తున్నాయి. ఇక తెలంగాణలో ఇప్పటికే రెండు విడతలుగా కోవిడ్ -19 వ్యాక్సిన్ డ్రై రన్ లు పూర్తి అయ్యాయి. జనవరి 2న ఏడు సెంటర్లలో, జనవరి 8న 800 సెంటర్లలో కరోనా వాక్సిన్ డ్రైరన్ పూర్తి  చేసినట్లు రాష్ట్ర ఆరోగ్య శాఖ మంత్రి ఈటల రాజేందర్ తెలిపారు. ప్రభుత్వ హాస్పత్రులతో పాటు ప్రైవేట్ ఆస్పత్రులు కూడా  డ్రైరన్ నిర్వహిస్తున్నాయని అన్నారు.

రాష్ట్రంలో 2 లక్షల 90 వేల మందికి కరోనా  వాక్సిన్ వేయనున్నట్లు మంత్రి చెప్పారు. ముందుగా ఫ్రంట్‌ లైన్‌ వారియర్స్ అయిన వైద్య సిబ్బందికి, శానిటేషన్ సిబ్బందికి  కరోనా వ్యాక్సిన్ అందిస్తామని స్పష్టం చేసారు. ఇక కరోనా వ్యాక్సిన్ వేయుటకు పది వేల మంది నిష్ణాతులకు శిక్షణ ఇచ్చినట్లు వెల్లడించారు. ఇక కరోనా కొత్త స్ట్రెయిన్‌ వైరస్ గురించి కూడా మంత్రి స్పందించారు. కొత్త స్ట్రెయిన్‌ వైరస్ పై ఎలాంటి ఆందోళన అవసరం లేదని అన్నారు. ఇక రాష్ట్రంలో బర్డ్‌ ఫ్లూ వల్ల ఎలాంటి నష్టం లేదని, బర్డ్‌ ఫ్లూ విషయంలో ఎవరూ ఆందోళన చెందొద్దని సూచించారు.