తెలంగాణలో సత్తా చాటుతున్న కమలనాథులు ఆంధ్రాలోనూ పాగా వేయడానికి ఇదే అదునుగా చూస్తున్నాయి. రాష్ట్రంలో పరిణామాల కారణంగా బీజేపీ బలపడతుందేమోనని టీడీపీ అధినేత చంద్రబాబు భావిస్తున్నారు. ఈ క్రమంలోనే ఈ ప్రభావం తిరుపతి లోక్ సభ ఉప ఎన్నికపై ఉండకుండా ఉండేందుకు చంద్రబాబు ఇప్పటినుంచే చర్యలు మొదలుపెట్టినట్టు తెలుస్తోంది. తిరుపతి ఉప ఎన్నిక అభ్యర్థిగా పనబాక లక్ష్మీ పేరును చంద్రబాబు ఇప్పటికే ఖరారు చేశారు. ఆమెను క్షేత్రస్థాయిలో పని చేసుకోవాలని కూడా ఆదేశాలు జారీ చేశారు. మరోవైపు ఈ ఉప ఎన్నిక కోసం టీడీపీ సీనియర్ నేతల సేవలను సాధ్యమైనంత ఎక్కువగా వినియోగించుకోవాలని చంద్రబాబు గట్టిగా నిర్ణయించుకున్నారని తెలుస్తోంది.