దుబ్బాక ఉప ఎన్నికలలో సోలిపేట రామలింగారెడ్డి భార్య సుజాతకు టికెట్ ఇచ్చినా, అక్కడ సెంటిమెంట్ రాజకీయం వర్కవుట్ కాలేదు. దీంతో ఇప్పుడు నాగార్జునసాగర్ నియోజకవర్గంలోని సెంటిమెంట్ రాజకీయానికి పెద్ద పీట వేస్తే,  ఫలితం తేడా కొట్టే అవకాశం ఉందనే  భయంతో నోముల నర్సింహయ్య కుటుంబ సభ్యులకు టికెట్ ఇచ్చేందుకు ఎట్టి పరిస్థితుల్లోనూ ఇష్టపడటం లేదు. ఇప్పటికే ఆ విషయం కేసీఆర్ నోముల నరసింహయ్య కుటుంబ సభ్యులకు తెలియజేశారు. దానికి బదులుగా భవిష్యత్తులో వారి కుటుంబ సభ్యుల్లో ఒకరికి నామినేటెడ్ పోస్టు ఇస్తామని కేసీఆర్ హామీ ఇచ్చి వారిని ఒప్పించినట్టు తెలుస్తోంది.

ఇక ఇక్కడి నుంచి ఎవరిని అభ్యర్థిగా రంగంలోకి దించాలనే విషయంపై పార్టీ నాయకులతో చర్చించినట్లు తెలుస్తోంది. కాంగ్రెస్ పార్టీ నుంచి జానారెడ్డి గాని, ఆయన కుమారుడు కాని పోటీ చేసే అవకాశం ఉన్న నేపథ్యంలో , అదే సామాజిక వర్గానికి చెందిన వారికి టిక్కెట్ ఇస్తే గెలుపు తమ ఖాతలో పడుతుందని టిఆర్ఎస్ నాయకులు అభిప్రాయపడుతున్నట్లు సమాచారం. ఈ నేపథ్యంలోనే ముగ్గురు పేర్లు తెరపైకి వచ్చాయి.  నల్గొండ జిల్లాకు చెందిన సీనియర్ నాయకుడు ప్రస్తుత శాసనమండలి చైర్మన్ గుత్తా సుఖేందర్ రెడ్డి, ఎమ్మెల్సీ తేరా చిన్నపరెడ్డి , అలాగే మరో సీనియర్ నాయకుడు ఎం సి కోటిరెడ్డి పేర్లు పరిశీలనకు వచ్చినట్లు తెలుస్తోంది. ఈ ముగ్గురిలో కేసిఆర్ అనుగ్రహం ఎవరిపై ఉంటుంది అనే విషయంపైనా జోరుగా చర్చ జరుగుతోంది. వీరే కాకుండా మరికొందరి పేర్లు ఇప్పుడు ప్రచారం లోకి వస్తున్నాయి.