అయితే ఇది ఇలా ఉండగా ఆస్ట్రేలియా టీంకి మరో గట్టి ఎదురుదెబ్బ తగిలింది. మ్యాచ్‌లో కేటాయించిన సమయంలోపు వేయాల్సిన ఓవర్ల కంటే రెండు ఓవర్లని ఆస్ట్రేలియా తక్కువగా వేసి ఉండటంతో.. స్లో ఓవర్ రేట్ తప్పిదం కింద ఆ జట్టుకి 40% మ్యాచ్ ఫీజుని జరిమానాగా విధిస్తూ మ్యాచ్ రిఫరీ నిర్ణయం తీసుకున్నాడు. దాంతో.. ఐసీసీ వరల్డ్ టెస్టు ఛాంపియన్‌షిప్‌లో నాలుగు పాయింట్ల కోత కూడా పడింది. సాధారణంగా వన్డే, టీ20ల్లో తరచూ జట్లు స్లో ఓవర్ తప్పిదానికి పాల్పడుతూ ఉంటాయి. కానీ.. టెస్టుల్లో ఈ తప్పిదం చోటు చేసుకోవడం చాలా అరుదు. ఒక ఓవర్‌ని తక్కువగా వేస్తే 20 శాతం, రెండు ఓవర్లకి 40 శాతం జరిమానా పడుతుంది. ఐసీసీ టెస్టు ఛాంపియన్‌షిప్ పాయింట్ల పట్టికలో ప్రస్తుతం ఆస్ట్రేలియా 322 పాయింట్లతో నెం.1 స్థానంలో ఉండగా.. భారత్ ఖాతాలో 390 పాయింట్లు ఉన్నా రెండో స్థానంతో సరిపెట్టుకోవాల్సి వచ్చింది. దానికి కారణం.. ఐసీసీ ఇటీవల రూల్స్‌ మార్చడమే. ర్యాంక్‌లను పాయింట్ల ఆధారంగా కాకుండా.. టీమ్స్ సాధించిన పాయింట్ల శాతం ఆధారంగా ఐసీసీ కేటాయిస్తోంది. దాంతో.. భారత్ (0.722) కంటే ముందు ఆస్ట్రేలియా (0.766) నిలిచింది.