ఇంతకీ ఆ వ్యక్తి ఎవరంటే రాబిన్ శర్మ. ఈ రాబిన్ శర్మ ఎవరంటే రాజకీయ వ్యూహకర్త. ఐప్యాక్ వ్యవస్ధాపకుడు, రాజకీయ వ్యూహకర్త ప్రశాంత్ కిషోర్ బృందంలో రాబిన్ శర్మ కీలక సభ్యుడుగా ఉండేవారు. మొన్నటి ఎన్నికల వరకు కూడా ప్రశాంత్ తో శర్మ కలిసే పనిచేశారు.  తర్వాత జరిగిన పరిణామాల వల్ల ఇద్దరు విడిపోయారు. ఆ తర్వాత సొంతకుంపటి పెట్టుకున్న శర్మతో 2024 ఎన్నికల్లో టీడీపీని గెలిపించటం కోసం చంద్రబాబు ఒప్పందం కుదుర్చుకన్నారు. ఆ శర్మనే ఇపుడు తిరుపతి ఉపఎన్నికలో కూడా రంగంలోకి దింపారని సమాచారం.

ఇదే విషయమై రాబిన్ తిరుపతి లోక్ సభ పరిధిలోని ఏడు అసెంబ్లీ నియోజకవర్గాల్లో తమ బృందాన్ని రంగంలోకి దింపేశారట. గ్రామస్ధాయి నుండి నియోజకవర్గం హెడ్ క్వార్టర్స్ వరకు ఉన్న పరిస్ధితులను అధ్యయనం చేయటమే టార్గెట్ గా శర్మ బృందం పనిలోకి దిగేసిందని సమాచారం. టీడీపీ తరపున పోటీ చేయబోయే అభ్యర్ధిగా పనబాక లక్ష్మిని ప్రకటించే సమయానికే  శర్మ బృందం క్షేత్రస్ధాయిలో పనిలోకి దిగేసిందట. అభ్యర్ధి విషయంలో జనాల్లో సానుకూలత తీసుకురావటం, నేతలు, శ్రేణులతో ప్రత్యేకంగా సమావేశాలు నిర్వహించటంపైనే ఈ బృందం ప్రత్యేక దృష్టి పెట్టిందట.