కాగా పితృత్వ సెలవులపై వెళ్ళిన కెప్టెన్ విరాట్ కోహ్లీ టెస్టు సిరీస్ కు అందుబాటులో లేకపోవడంతో అజింక్య రహానే టెస్టు సిరీస్ నాయకత్వ బాధ్యతలను చేపట్టిన విషయం తెల్సిందే. అయితే తొలి రోజే ఆస్ట్రేలియాను ఆలౌట్ చేయడంలో కెప్టెన్  అజింక్య రహానే ఎత్తులు ఫలించాయి. బౌలింగ్లో మార్పులు, ఫీల్డ్ ప్లేసింగ్ వంటి వ్యూహాలతో అసీస్ ను  195 పరుగులకే పరిమితం చేసారు. ఇక రెండో రోజు భారత్  మ్యాచ్ పై పట్టు బిగించడంలో రహనే క్లాస్ సెంచరీ ఎంతోగానో ఉపయోగపడింది. దీంతో అటు కెప్టెన్సీతో పాటు  ఇటు బ్యాటింగ్ లోనూ రహానే అద్భుత ప్రదర్శన చేస్తుండడంతో రహానేపై ప్రశంసల జల్లు కురుస్తోంది.

కాగా రహనే కెప్టెన్సీపై ఆసీస్ మాజీ సారథి రికీ పాంటింగ్ స్పందించాడు.  కోహ్లీ అందుబాటులో లేని సమయంలో రహనే సెంచరీ సాధించి జట్టును గొప్పగా ముందుకు నడిపిస్తున్నాడని ప్రశంసించాడు. కెప్టెన్ గా తొలి రోజు   వ్యూహాలతో అదరగొట్టాడని, రెండో రోజు బ్యాటుతో సత్తాచాటాడని అన్నాడు. ఇక ఈ సందర్భంగా విరాట్ కోహ్లీ కెప్టెన్సీపై కూడా పాంటింగ్ పలు వ్యాఖ్యలు చేసాడు. కోహ్లీ కోరుకున్నంత కాలం భారత్‌కు అతడే కెప్టెన్‌ అని అన్నాడు. అయితే ఒకవేళ కోహ్లీ బ్యాటింగ్‌పై ఎక్కువగా దృష్టి సారించాలని  కెప్టెన్సీని వదిలేస్తే మాత్రం ప్రపంచ బౌలర్లకు అది ఎంతో ప్రమాదకరమని తన అభిప్రాయాన్ని వ్యక్తం చేసాడు. అయితే కోహ్లీ కెప్టెన్సీపై ఎలాంటి సందేహాలు లేవని కానీ  ప్రతికులాంశాల్లో రహానే సత్తాచాటాడని చెప్పడమే తన ఉద్దేశమని అన్నాడు.