ఇక ఈ మ్యాచ్ లో హైదరాబాదీ పేసర్ మహ్మద్ సిరాజ్ తో పాటు యువ ఆటగాడు శుభమన్ గిల్ టెస్టు క్రికెట్ లోకి అర్రంగేట్రం చేసారు. లబుషేన్‌, గ్రీన్‌ల వికెట్లు తీసి సిరాజ్  మెరుగైన ప్రదర్శన చేయగా... గిల్ తొలి రోజు చక్కని షాట్లతో అలరించాడు. కాగా టెస్టు జట్టులో చోటు దక్కడం పట్ల సిరాజ్ భావోద్వేగానికి గురయ్యాడు. తొలి రోజు ఆట ముగిసిన అనంతరం సిరాజ్ మాట్లాడాడు. టీమిండియా క్యాప్‌ అందుకున్న తర్వాత నా జీవితంలో విలువైనది సాధించనట్లుగా అనిపించిందని అన్నాడు. మ్యాచ్ ప్రారంభం అయ్యాక  తర్వాత బౌలింగ్ చేయాలని ఎంతో ఆతృతగా ఎదురుచూశానని, కానీ తొలి సెషన్ తర్వాత లంచ్‌ అనంతరం  బౌలింగ్‌ చేయాలని కెప్టెన్ రహానె చెప్పాడని వివరించాడు. రహానె, బుమ్రాతో మాట్లాడిన అనంతరం ఆత్మవిశ్వాసం మరింత పెరిగిందని అన్నాడు.

కాగా సిరాజ్‌ భారత్‌ తరఫున టెస్టుల్లో, వన్డేల్లో ఆడాలన్నది మా నాన్న కల అని సిరాజ్‌ సోదరుడు ఇస్మాయిల్‌ అన్నారు. ఆ కల ఈ రోజుతో నేరవేరినట్లు చెప్పాడు. కాగా ఐపీఎల్ అనంతరం ఆస్ట్రేలియా పర్యటనకు మహ్మద్ సిరాజ్ ఎంపిక అయ్యాడు. అయితే సిరాజ్ ఆస్ట్రేలియా పర్యటనలో ఉండగానే అతని తండ్రి మరణించాడు. అయితే సిరాజ్ తండ్రి కల కోసం.. బాధను భరిస్తూ ఆసీస్‌లోనే ఉండిపోయాడు. తండ్రి అంత్యక్రియలకు కూడా హాజరు కాలేదు. ఇక తొలి టెస్టులో సిరాజ్ కు చోటు దక్కలేదు. అయితే, సీనియర్ పేసర్ షమి గాయంతో సిరీస్ నుంచి వైదొలగడంతో బాక్సింగ్ డే టెస్టులో చోటు సంపాదించాడు.