ఆయన ఎదురుచూస్తున్న అవకాశం తిరుపతి పార్లమెంట్‌ స్థానానికి ఉప ఎన్నిక రూపంలో వచ్చింది. ఆయన ప్రాతినిధ్యం వహిస్తున్న ఎమ్మెల్యే స్థానం తిరుపతి పార్లమెంట్‌ పరిధిలో ఉంది. అక్కడ ఎంపీ ఇటీవల కాలంలో మరణించడంతో త్వరలో ఉప ఎన్నిక జరగనుంది. ఈ ఎన్నికల్లో గెలవాలంటే ఆనం రామనారాయణ రెడ్డి సహకారం ఎంతో అవసరం. కానీ, ఇన్నాళ్ల నుంచి ఆయనను దూరం పెట్టిన నేతలు ఇప్పుడు ఆయనపైనే ఆధారపడాల్సిన పరిస్థితి వచ్చింది. దీనినే ఆయన ఆయుధంగా మలుచుకున్నారు. ఈ నేపథ్యంలోనే రాజకీయాల్లో శాశ్వత మిత్రులు గానీ శాశ్వత శత్రువులు గానీ ఉండరని తాజాగా వ్యాఖ్యానించారు. త్వరలో జరగబోయే తిరుపతి పార్లమెంట్‌ ఉప ఎన్నికల్లో ఆనం కుటుంబీకుల మార్క్‌ ఏంటో చూపిస్తానని కూడా చెప్పారు. ఆనం వివేకానందరెడ్డి మృతి తర్వాత తమ కుటుంబం నెల్లూరు నగరానికి దూరమైందని భావించడం కూడా సరికాదన్నారు. నగరంలోని ప్రతి కుటుంబంలోనూ తమ అభిమానులున్నారని చెప్పారు. ఈ వ్యాఖ్యలే ఇప్పుడు వైసీపీ గుండెల్లో రైళ్లు పరుగెత్తేలా చేస్తున్నాయి. వైసీపీతో ఇప్పటికే అంటీముట్టనట్టుగా ఉంటున్న రామనారాయణరెడ్డి ఇప్పుడు ఎందుకీ వ్యాఖ్యలు చేశారు.

తిరుపతి ఉప ఎన్నికల్లో ఆయన వైసీపీకి హ్యాండిస్తారా.. ఇతర పార్టీలకు మద్దతు తెలుపుతారా అన్న అనుమానాలు వారిని నిద్రపోనివ్వడం లేదట. ఒకవేళ ఇదే జరిగితే వైసీపీ భారీ మూల్యం చెల్లించుకోక తప్పదన్న భావనలో జగన్‌ పరివారం ఉందని ఆ పార్టీ కార్యకర్తలు గుసగుసలాడుతున్నారట. మొత్తానికి తనకూ ఓ సమయం వచ్చిందని ఆనం రామనారాయణరెడ్డి సంతోషంగా ఉన్నారట. అయితే, ఆనం వ్యాఖ్యల వెనుక అంతరార్ధం ఏమిటో అర్ధం కాక వైసీపీ నేతలు మల్లగుల్లాలు పడుతున్నారట.