ఎన్నాళ్లగానో తమిళ్ సూపర్ స్టార్ రజిని రాజకీయ అరంగేట్రానికి సంబంధించి ఎన్నో పుకార్లు షికార్లు చేశాయి. తమ అభిమాన కథానాయకుడిని రాజకీయ తెరపై కూడా చూసే వేడుకను కల్పించాలంటూ రజిని ఫాన్స్ ఎన్నోసార్లు విజ్ఞప్తులు చేస్తూ వచ్చారు. ఎన్నికలు వస్తున్నాయి..పోతున్నాయి కానీ రజిని నుంచి సానుకూల ప్రకటన రాలేదు. 

ఎట్టకేలకు ఈ సారి పార్టీ పెట్టి ఎన్నికల్లో పోటీ చేస్తానంటూ రాజకీయ ప్రకటన చేశారు. దాంతో, ఆయన అభిమానులంతా ఖుషి అయ్యారు. అలా ఓ సూపర్ స్టార్ మొదటి అధ్యాయం ముగిసింది. 

ఇదిలా ఉండగా తమిళనాట మరో కొత్త పార్టీ పుట్టుకొస్తోందంటూ సంకేతాలు వెలువడుతున్నాయి. మాజీ సీఎం కరుణానిధి కుమారుడు అళగిరి తానూ ఓ పార్టీ పెట్టి ఎన్నికల్లో పోటీ చేస్తానంటూ సూచనప్రాయంగా తెలిపారు. గోపాలపురంలో ఉంటున్న తన తల్లి దయాళు అమ్మాళ్ అనారోగ్యంతో బాధపడుతుండటంతో ఆమెని కలిసేందుకు అళగిరి గోపాలపురం వచ్చారు. ఈ సందర్భంగా ఆయన మాట్లాడుతూ జనవరి ౩న అనుచరులు, కార్యకర్తలతో ఓ సమావేశం నిర్వహిస్తున్నానని చెప్పారు. ఆ సమావేశంలోనే కొత్త పార్టీ పెట్టడంపై అభిప్రాయ సేకరణ చేస్తానన్నారు. కార్యకర్తలు కొత్తపార్టీ పెట్టాలని సూచిస్తే తప్పకుండా స్థాపిస్తానంటూ ప్రకటించారు. ఈ సందర్భంగానే డీఎంకే కి మద్దతు ఇవ్వనంటూ ఖరాకండిగా చెప్పేసారు. 

షూటింగ్ లో ఉన్న రజిని చెన్నయి రాగానే కలుస్తానని తెలిపారు. బహుశా, ఆయనతో కూడా రాజకీయ అంశాలు చర్చలోకి వచ్చే అవకాశం ఉందని కార్యకర్తలు భావిస్తున్నారు. సో..తమిళనాట మరో కొత్త పార్టీ పురుడు పోసుకోనుందని అళగిరి వ్యాఖ్యల బట్టీ అర్ధమవుతోంది.