పంచాయితీ ఎన్నికల నిర్వహణపై స్టేట్ ఎలక్షన్ కమిషన్ జారీ చేసిన ప్రొసీడింగ్స్ ని కొట్టివేయాల్సిందిగా ప్రభుత్వం హై కోర్టును ఆశ్రయించిన సంగతి విదితమే. ఈ నేపథ్యంలోనే స్టేట్ ఎలక్షన్ కమిషన్ తో చర్చలు జరపాల్సిందిగా రాష్ట్రప్రభుత్వానికి హై కోర్టు సూచించింది. ప్రధాన కార్యదర్శి లేదా ముఖ్య కార్యదర్శి హోదాకి తగ్గని ఇద్దరు లేదా ముగ్గురు అధికారులతో కమిటీని ఏర్పాటు చేయాల్సిందిగా సూచించింది. కోర్టు ఉత్తర్వులు అందిన మూడు రోజుల్లోగా ఈ కమిటీతో సమావేశమయ్యే వేదికను స్టేట్ ఎలక్షన్ కమిషన్ నిర్ణయించాల్సి ఉంటుందని తెలియచేసింది. 

ఎన్నికల నిర్వహణకు గల అభ్యంతరాలను, కరోనా వాక్సినేషన్ కి సంబంధించిన వివరాలను స్టేట్ ఎలక్షన్ కమిషన్ కి ఈ కమిటీ చెప్పాలని సూచించింది. అదే సమయంలో స్థానిక ఎన్నికలు త్వరితగతిన నిర్వహించాల్సిన అవసరాన్ని స్టేట్ ఎలక్షన్ కమిషన్ తెలియచేయాల్సి ఉంటుంది. 

సంప్రదింపులు ద్వారా సమస్య పరిష్కరించుకోవాల్సిందిగా హై కోర్టు సూచించింది. ఈ ప్రతిపాదనకు ఇరు పక్షాల న్యాయవాదులు అంగీకారం తెలిపారు. అయితే, ఏపీ ప్రభుత్వం ఈ విషయంలో ఏ విధంగా స్పందిస్తుందోననే ఉత్కంఠ సర్వత్రా నెలకొని ఉంది. సమన్వయము, సహకారం అందించే సుహృద్భావ వాతావరణం ఉందా? అనేదే ఇక్కడి ప్రశ్న. స్థానిక ఎన్నికలు మధ్యలో ఉండగానే కరోనా ఉందంటూ స్టేట్ ఎలక్షన్ కమిషన్ ఆరువారాలపాటు ఎన్నికలను వాయిదా వేసింది. దాంతో, ప్రభుత్వం ఒక్కసారి ఉలిక్కిపడింది. స్టేట్ ఎలక్షన్ కమిషన్ పై మాటల దాడిని ప్రభుత్వంలో ఉన్న కీలక నేతలంతా సంధించారు. 

తర్వాత స్థానిక ఎన్నికలు నిర్వహిస్తామని స్టేట్ ఎలక్షన్ కమిషన్ చెబుతుంటే ప్రభుత్వం కరోనా సాకుగా చూపించి ససేమిరా అంటోంది. అంతకు ముందే...స్టేట్ ఎలక్షన్ కమిషనర్  పదవి కాలాన్ని కుదిస్తూ ఆర్డినెన్స్ తెచ్చి మరీ తమిళనాడుకు చెందిన మాజీ న్యాయమూర్తి కనగ రాజు ను ప్రభుత్వం నియమించిన సంగతి తెలిసిందే. దానిపై కోర్టుకు వెళ్లిన స్టేట్ ఎలక్షన్ కమిషనర్ కి అనుకూలంగా తీర్పు వెలువడింది. దాంతో, మధ్యలో ఆగిపోయిన పంచాయితీ ఎన్నికలను నిర్వహిస్తామంటూ స్టేట్ ఎలక్షన్ కమిషన్ ప్రకటించడం...ప్రభుత్వం అంగీకరించకపోవడం కూడా తెలిసిందే. దీనిపై కోర్టు స్పందిస్తూ ఇరు పక్షాలను కూచుని మాట్లాడుకోవాల్సిందిగా సూచించింది. విషయం తేలాలంటే మరి కొంత కాలం ఆగాల్సిందే.