మరణించిన సిటింగ్ ఎమ్మెల్యే,నోముల నర్సింహయ్య కుటుంబ సభ్యులకు పోటీ చేసే అవకాశాన్నిఇవ్వాలని అధికార  టీఆరెస్ పార్టీ నిర్ణయించుకుంది. కాంగ్రెస్ పార్టీ తమ అభ్యర్థిగా జానా రెడ్డి పేరును దాదాపు ఖరారు చేసినట్లు తెలుస్తోంది. ప్రత్యామ్నాయంగా మరికొంతమంది పేర్లను కూడా అధిష్ఠానం పరిశీలిస్తోందని సమాచారం   జానారెడ్డి పార్టీ మారుతారంటూ, బీజేపీలో చేరుతారంటూ ప్రచారం ముమ్మరమైన నేపథ్యంలో ఆయన తాను పార్టీ మారడం లేదని, ఇదంతా మీడియా సృష్టేనంటూ ప్రకటన చేసారు. 

పార్టీ అధిష్టానం ఇష్ట ప్రకారం తాను నడుచుకుంటానని చెప్పారు. జానారెడ్డికి నాగార్జున సాగర్లో మంచి పట్టుంది. అంతకు ముందు రెండుసార్లు గెలిచిన ఆయన తెరాస అభ్యర్థి నోముల చేతిలో స్వల్ప ఓట్ల తేడాతో ఓటమి చెందారు. ఆ నియోజకవర్గంలో జానా రెడ్డి కి ఉన్న పట్టు ఆధారంగా కాంగ్రెస్ గెలిచి తీరుతుందని భావిస్తోంది. 

దుబ్బాక ఉప ఎన్నిక విజయం ఇచ్చిన ఉత్తేజంతో గ్రేటర్ ఎన్నికల్లో తెరాస ని చెమటలు పట్టించిన బీజేపీ నాగార్జున సాగర్ లో కూడా కాషాయ జెండా ఎగురవేయాలని పంతంతో ఉంది. 

ఈ సారి పార్టీ సీనియర్ నేత కడారి అంజయ్య యాదవ్, జిల్లా అధ్యక్షుడు కంకణాల శ్రీధర్ రెడ్డి బీజేపీ అగ్రనాయకులు కలసి తమకు పోటీ చేసే అవకాశం ఇవ్వాల్సిందిగా కోరినట్లు ప్రచారం జరుగుతోంది. అయితే, రెండు పార్టీలకు గట్టి పోటీ ఇచ్చే అభ్యర్థి కోసం బీజేపీ అన్వేషిస్తున్నట్లు తెలుస్తోంది. ఇలా ఇప్పటినుంచే ప్రధాన పార్టీలన్నీ నాగార్జున సాగర్ వైపు చూపు సారిస్తున్నారు.