ఈ సందర్భంగా మాజీ సీఎం రమణ్ సింగ్ మాట్లాడుతూ.. జగన్ ప్రభుత్వం కేంద్ర పథకాలకు నవరత్నాలు అని పేరు మార్చి అందిస్తోందని విమర్శించారు. బీజేపీ రాష్ట్ర కార్యవర్గాన్ని ఉద్దేశించి ఆన్‌లైన్‌లో రమణ్ సింగ్ ప్రసంగించారు. రాష్ట్ర ఆర్థిక పరిస్థితులు జగన్ పాలనలో అస్తవ్యస్తంగా మారాయన్నారు. ఆంధ్రప్రదేశ్‌లో బీజేపీ పాలన రావడం ఖాయమని స్పష్టం చేశారు. పోలవరం, ప్రత్యేక హోదా, విశాఖపట్నం రైల్వే జోన్‌ల విషయంలో బీజేపీపై దుష్ప్రచారం చేస్తున్నారని తీవ్ర స్థాయిలో ఆగ్రహం వ్యక్తం చేశారు. అలాగే తిరుపతి ప్రజలను ఆకర్షించేందుకు నగరంలో బీజేపీ శోభాయాత్ర నిర్వహించనుంది. తిరుపతి పార్లమెంటు ఉప ఎన్నికలను దృష్టిలో ఉంచుకుని బీజేపీ రాష్ట్ర అధ్యక్షుడు సోము వీర్రాజు, బీజేపీ తిరుపతి పార్లమెంటరీ జిల్లా అధ్యక్షుడు సన్నారెడ్డి దయాకర్ రెడ్డి ఆధ్వర్యంలో శోభాయాత్ర నిర్వహించనున్నారు. శనివారం సాయంత్రం 4 గంటలకు తిరుపతి ఆర్టీసీ బస్టాండు ఎదురుగా ఉన్న అంబేద్కర్ విగ్రహం నుంచి గాంధీ రోడ్డు వరకు శోభాయాత్ర ఉంటుంది. శోభాయాత్రలో బీజేపీ జాతీయ, రాష్ట్ర నాయకులు పాల్గొననున్నారు. కాగా, ప్రస్తుతం జరుగుతున్న పరిణామాలను చూస్తే మిత్రపక్షం అయిన జనసేన పార్టీకి బీజేపీ పార్టీ ఈ ఉప ఎన్నికలపై స్పష్టమైన సంకేతాలు పంపినట్లు తెలుస్తోంది. ఈ ఉప ఎన్నిక పార్లమెంట్ సీటు నేపథ్యంలో జరుగుతున్న ఎన్నికలు కాబట్టి ఈ సీటు బీజేపీకే ఉపయోగకరమని భావించి జనసేన ఇప్పటివరకు తిరుపతిలో ఎలాంటి కార్యక్రమం చేపట్టలేదు. తద్వారా బీజేపీ స్పష్టమైన సంకేతాలు ఇవ్వటమే కాకుండా జనసేన సపోర్ట్ తో ఈ సీటుని ఎలాగైనా గెలవాలనే కృతనిశ్చయంతో ఉన్నట్లుగా తెలుస్తుంది.