చలి తీవ్రత పెరిగే కొద్దీ కరోనా తీవ్రత కూడా పెరిగే అవకాశం ఉంటుందని స్పష్టం చేసింది. జనవరి 15 తర్వాత కరోనా కేసులు పెరిగే ప్రమాదం లేకపోలేదని, రెండో దశను ఎదుర్కొనేందుకు అప్రమత్తంగా ఉండాల్సిన అవసరం ఉందని సూచించింది. పలు దేశాలు, రాష్ట్రాల్లో కరోనా పరిస్థితులను పరిగణనలోకి తీసుకోగా.. కరోనా పీక్‌ (తీవ్రత ఎక్కువగా)లో ఉన్న దశ నుంచి ఐదు నెలల విరామం తర్వాత సెకండ్‌ వేవ్‌ వచ్చిందని పేర్కొంది. ప్రస్తుతం దేశ రాజధాని ఢిల్లీలోనూ అదే జరిగిందని నిపుణులు అంచనా వేశారు. ఏపీలో ఆగస్టు – సెప్టెంబర్‌ మధ్య తీవ్రత ఎక్కువగా ఉందని, ఆ తర్వాత క్రమంగా తగ్గిందని తెలిపింది. తిరిగి ఐదు నెలల తర్వాత అంటే 2021 జనవరి 15 నుంచి మార్చి 15లోగా రెండో దశకు అవకాశాలున్నాయని నివేదిక హెచ్చరించింది. అయితే ఈ దశలో వైరస్‌ తీవ్రత ఎంతగా ఉంటుందనేది ఇప్పుడే అంచనా వేయలేమని వివరించింది.
 

అమెరికా, యూరప్, ఆస్ట్రేలియాతో పాటు ఢిల్లీ, హర్యానా, గుజరాత్, మధ్యప్రదేశ్, పశ్చిమ బెంగాల్, కేరళ రాష్ట్రాల్లో పరిస్థితులను నిపుణులు అంచనా వేశారు. వీటిని బట్టి చూస్తే ఏపీలో కచ్చితంగా వస్తుందని, రాదు అని గానీ చెప్పలేమని, వచ్చేందుకు అవకాశాలు మాత్రం ఉన్నాయని తెలియజేసింది. సెకండ్‌ వేవ్‌ పరిస్థితులకు ఇప్పటి నుంచే సంసిద్ధంగా ఉండటం మంచిదని, సెకండ్‌ వేవ్‌లో చాలా దేశాలు, రాష్ట్రాల్లో స్కూళ్లు మూసేశారని తెలిపారు. కరోనా రెండో దశ అంచనాలపై ప్రభుత్వం ఏడుగురు సభ్యులతో ఓ నిపుణుల కమిటీ నియమించింది. ఇందులో ప్రభుత్వ ఆస్పత్రుల్లో పనిచేసే నలుగురు, ప్రైవేటు ఆస్పత్రులకు చెందిన వారు ముగ్గురు ఉన్నారు. వీరిలో కమ్యూనిటీ మెడిసిన్, జనరల్‌ మెడిసిన్, సోషియల్‌ ప్రీవెంటివ్‌ మెడిసిన్, న్యూరో ఫిజిషియన్‌ ప్రభుత్వ నిపుణులు కాగా, కార్డియాలజీ, నెఫ్రాలజీ, పల్మనరీ మెడిసిన్‌ నిపుణులు ప్రైవేట్‌కు చెందినవారు. ఈ ఏడుగురు నిపుణుల కమిటీ కరోనా సెకండ్‌ వేవ్‌ అవకాశాలు, వాటిపై తీసుకోవాల్సిన జాగ్రత్తలపై నివేదిక ఇచ్చింది. ప్రస్తుతం రాష్ట్రంలో 60,029 యాక్టివ్‌ కేసులు ఉన్నాయి.