ఎప్పటికప్పుడు పార్టీ పరిస్థితి మెరుగుపడుతుందని భావిస్తున్నా, ఆ పరిస్థితుల్లో మార్పు అయితే రావడం లేదు. ప్రస్తుతం తెలంగాణ పిసిసి అధ్యక్షుడిగా ఎవరిని ఎంపిక చేయాలి అనే విషయంపైనే పెద్ద ఎత్తున కసరత్తు జరుగుతోంది. ఈ పదవిని ఆశిస్తున్న వారిలో రేవంత్ రెడ్డి , కోమటిరెడ్డి వెంకట్ రెడ్డి,  దుద్దిళ్ల శ్రీధర్ బాబు, జానా రెడ్డి, జగ్గారెడ్డి, వి.హనుమంతరావు ఇలా చాలా మంది ఉన్నారు. వీరిలో ఎవరిని పిసిసి అధ్యక్షుడిగా ఎంపిక చేయాలి అనే విషయంపై తెలంగాణ కాంగ్రెస్ వ్యవహారాల ఇన్చార్జి మాణిక్యం ఠాకూర్ తీవ్రంగా కసరత్తు చేస్తున్నారు. ఈ మేరకు పార్టీలో మాజీ ఎమ్మెల్యేలు,  ఎమ్మెల్యేలు , ఎంపీలు మాజీ మంత్రులు కీలక నాయకులు అందరి అభిప్రాయాలను తెలుసుకుంటున్నారు. 

ఈరోజు అధిష్టానానికి నివేదిక అందించేందుకు ఢిల్లీ కూడా ఆయన వెళ్ళబోతున్న నేపథ్యంలో ఆకస్మాత్తుగా ఎవరినీ సంప్రదించకుండానే సంగారెడ్డి ఎమ్మెల్యే జగ్గారెడ్డి తాను త్వరలోనే పాదయాత్ర చేపట్టబోతున్నాను అంటూ స్వయంగా ప్రకటించడం ఈ విషయంపై పార్టీ నేతలతో చర్చించకపోవడం వంటి వ్యవహారాలు మళ్లీ కాంగ్రెస్ లో కాక పుట్టిస్తున్నాయి.