తాజాగా ఉద్యోగ సంఘాలు భారత్ బంద్ కు మద్దతు తెలియజేసిన అప్పటి నుంచి బిజెపి టీ ఎన్జీవో నేతలను టార్గెట్ చేసుకుంటూ విమర్శలు చేస్తోంది. అసలు ఉద్యోగ సంఘాలు బంద్ లో ఎలా పాల్గొంటారని ప్రశ్నిస్తున్నారు. రైతుల సమస్యల కు ఉద్యోగ సంఘాలకు సంబంధం ఏమిటని బిజెపి ప్రశ్నిస్తోంది. ఉద్యోగుల సమస్యలను పట్టించుకోకుండా, ఉంచుకున్నోళ్లు పెంచు కున్నోళ్ల కోసం జీవోలు తెచ్చుకుంటున్నారని టీ ఎన్జీవో నేతలను ఉద్దేశించి ఆరోపణలు చేశారు. ఉద్యోగ సంఘాల నాయకులు అడ్డంపెట్టుకుని అక్రమంగా సంపాదించారని, అలాంటి వారి సంగతి తేలుస్తామని వార్నింగ్ ఇచ్చేశారు. అయితే టీఎన్జీవో నేతలపై ఒక్కసారిగా బీజేపీ ఆగ్రహం వ్యక్తం చేయడం చర్చనీయాంశం అవుతోంది. ఎందుకంటే ఉద్యోగ సంఘాల నాయకులు ఎవరు గతంలో ఈ విధంగా విమర్శలు చేయలేదు. వారి మద్దతు కోసం ప్రయత్నించేవారు. దీనికి కారణం తెలంగాణ లో ఉద్యోగ సంఘాల పాత్ర ఎక్కువగా ఉండటం, ఎన్నికలలో గెలుపొందారు అంటే వారి మద్దతు తప్పనిసరిగా కావాల్సి రావడం వంటి వాటితో వారి మద్దతు కోసం పార్టీలు ప్రయత్నించే వారు కానీ ఇప్పుడు బండి సంజయ్ వారిని టార్గెట్ చేసుకుని విమర్శలు చేస్తున్నారని సర్వత్రా ఆశ్చర్యం, ఆసక్తి నెలకొన్నాయి. 

దీనికి కారణం గతంలో టీఎన్జీవో రాష్ట్ర అధ్యక్షుడిగా పనిచేసిన స్వామి గౌడ్ ప్రస్తుతం బిజెపిలో ఉన్నారు. స్వామి గౌడ్ ద్వారా టీఎన్జీవో సంఘంలో చీలిక తెచ్చే విధంగా బిజెపి ప్రయత్నిస్తున్నట్లుగా అర్థమవుతుంది. స్వామి గౌడ్ మాత్రమే కాకుండా ఉద్యోగ సంఘాల మాజీ నేత దీనికి సహకారం అందిస్తూ ఉండడంతో వారిద్వారా ఉద్యోగులను ఆకర్షించి టీఎన్జీవో లో చీలిక తీసుకువచ్చి టిఆర్ఎస్ కు వారి మద్దతు లేకుండా చేయాలనే లక్ష్యంతో ముందుకు వెళ్తున్నట్లు కనిపిస్తున్నారు. ఇక టీఎన్జీవో నేతలపై ఉద్యోగస్తుల్లోనూ అసంతృప్తి ఉన్న విషయాన్ని బిజెపి గుర్తించింది. ఉద్యోగుల సమస్యలపై టీఎన్జీవో నేతలు ప్రభుత్వం దగ్గర బలంగా వాదించడం లేదని , ఉద్యోగుల సమస్యలను పట్టించుకోవడం లేదని చాలా కాలంగా ఉద్యోగస్తులు అసంతృప్తితో ఉన్నారు. ఇటువంటి అసంతృప్తులను గుర్తించే బండి సంజయ్ వంటివారు టీఎన్జీవో నాయకులను టార్గెట్ చేసుకుంటూ విమర్శలు చేస్తూ, ఉద్యోగ సంఘాలలో చీలిక తెచ్చే విధంగా ముందుకు వెళ్తున్నట్టుగా కనిపిస్తున్నారు.