కొత్త చట్టాలతో  రైతులు తామ పండించిన పంటలను మార్కెట్లు లేదా బయట ఎక్కడైనా అమ్ముకునే వెసులుబాటు ఉందని ప్రధాని మోడీ చెప్పారు. దేశ వ్యాప్తంగా కోల్డ్ స్టోరేజీలను ఆధునికీకరిస్తామని తెలిపారు. కొత్త చట్టాలతో  భవిష్యత్తులో వ్యవసాయ రంగంలో పెట్టుబడులు పెరుగుతాయని ఆయన ఆశాభావం వ్యక్తం చేశారు. రైతుల ఆదాయాన్ని పెంచి.. వారి జీవితాల్ని మరింత సుభిక్షంగా మార్చాలన్న ఉద్దేశంతోనే కొత్త చట్టాల్ని తీసుకొచ్చామని ప్రధాని మోడీ మరోసారి స్పష్టం చేశారు.  రైతుల ప్రయోజనాల్ని కాపాడేందుకు తమ ప్రభుత్వం కట్టుబడి ఉందని తేల్చి చెప్పారు. 

 మరోవైపు రైతుల ఆందోళనలు 17వ రోజుకు చేరాయి. దీంతో ఢిల్లీ  సరిహద్దులో నిరసన తెలుపుతున్న  రైతుల సంఘాల ప్రతినిధులను కేంద్ర ప్రభుత్వం మరోసారి చర్చలకు పిలిచింది.  ఉద్యమాన్ని విరమించి సంప్రదింపులకు రావాలని కేంద్ర వ్యవసాయ శాఖ మంత్రి నరేంద్ర సింగ్‌ తోమర్‌ విజ్ఞప్తి చేశారు. సుదీర్ఘ చర్చల తర్వాతనే నూతన వ్యవసాయ చట్టాలను తీసుకొచ్చామని, ఇవి కచ్చితంగా రైతుల జీవితాల్లో మార్పు తెస్తాయని ఆయన ఆశాభావం వ్యక్తం చేశారు. అయితే  చట్టాలను రద్దు చేయడం తప్ప, మరిదేనినీ అంగీకరించబోమని రైతు సంఘాలు తేల్చి చెబుతున్నాయి.