చిత్తూరు జిల్లా కురబలకోట మండలం అంగళ్లు వద్ద తెలుగుదేశం పార్టీ నేతలపై వైసీపీ నేతలు చేసిన దాడిని మాజీ ముఖ్యమంత్రి చంద్రబాబు తీవ్రంగా ఖండించారు. టీడీపీ నేతలను గాయపర్చడం, వారి వాహనాలను ధ్వంసం చేయడం పట్ల ఆయన ఆగ్రహం వ్యక్తం చేశారు. బి.కొత్తకోటలో మరణించిన పార్టీ కార్యకర్తల కుటుంబాలను పరామర్శించేందుకు వెళ్తున్న నాయకులపై దాడి చేయడం దారుణమన్నారు చంద్రబాబు. జగన్‌ మోహన్‌ రెడ్డి ఫాసిస్ట్‌ పాలనకు ఈ దాడులు అద్దం పడుతున్నాయని టీడీపీ అధినేత ధ్వజమెత్తారు.   

            ఆంధ్రప్రదేశ్ లో ప్రస్తుతం  బడుగు, బలహీనవర్గాలపై దాడులు జరగని రోజే లేదని చంద్రబాబు ఆరోపించారు. ప్రతి రోజూ బీసీ, ఎస్సీ, ఎస్టీ, ముస్లిం మైనారిటీలపై దమనకాండ యథేచ్ఛగా కొనసాగుతోందని చెప్పారు. రాష్ట్రంలో నేరగాళ్ల అరాచకాలను నియంత్రించే వ్యవస్థే లేకుండా పోయిందన్నారు. జగన్‌ రెడ్డి సీఎం అయ్యాక పోలీసు వ్యవస్థ నీరు గారి పోయింజని... రాష్ట్రంలోని పేదలు, సామాన్యులకు రక్షణ లేకుండా పోయిందని చంద్రబాబు విరుచుకుపడ్డారు.  దాడులు, దౌర్జన్యాలకు పాల్పడేవాళ్లపై కఠిన చర్యలు తీసుకోవాలని  చంద్రబాబు డిమాండ్‌ చేశారు.