నిబంధనల ప్రకారం స్మృతివనంలోకి రాత్రి 7గంటలు దాటితే ఎవర్నీ అనుమతించరు. అలాంటిది ఏకంగా రాత్రి 9గంటల నుంచి అర్ధరాత్రి ఒంటిగంట వరకు మాజీ కౌన్సిలర్లు, మున్సిపల్ ఎన్నికల పోటీలో అభ్యర్థులుగా ఉన్నవారు అమ్మాయిలతో కలిసి చిందులు వేశారు. వైసీపీ నేతల ఈ తాజా నిర్వాకానికి సంబంధించిన వీడియోలు సోషల్ మీడియాలో వైరల్ గా మారాయి. దీంతో గుంటూరు రూరల్ ఎస్పీ విశాల్ గున్నీ ఆ ఘటన పై విచారణకు ఆదేశించారు. ఎంత అధికారంలో ఉంటే మాత్రం ఒక మహనీయుడి సమాధి వద్ద ఇలా అవమానించేలా ప్రవర్తిస్తారా అని మరోపక్క స్థానికులు మండిపడుతున్నారు.

           గత టీడీపీ ప్రభుత్వం రూ.10 కోట్లతో వావిలాల స్మృతివనాన్ని సుందరంగా తీర్చిదిద్దింది. స్థానికులు ఎంతో పవిత్రస్థలంగా భావించే స్మృతి వనంలో ఈ విధంగా మందుపార్టీలు చేసుకోవడంపై అన్ని వర్గాల నుంచి తీవ్ర విమర్శలు వస్తున్నాయి. మహాత్మ గాంధీ స్పూర్తితో మద్యనిషేధం అమలు చేస్తున్నామంటున్న వైసీపీ నేతలు.. అదే మద్యనిషేధం కోసం ఉద్యమించిన గాంధేయవాది వావిలాల గోపాల కృష్ణయ్య సమాధినే మందు పార్టీలు, రికార్డింగ్ డాన్సులకు వేదికగా చేయడాన్ని జనం తప్పుబడుతున్నారు. ఈ ఘటనకు నిరసనగా వివిధ పార్టీల స్థానిక నేతలు ఆందోళనకు దిగారు. టీడీపీ ఆధ్వర్యంలో స్మృతివనాన్ని పసుపునీటితో శుద్ధి చేశారు.