తాను కూడా పీసీసీ చీఫ్ రేసులో ఉన్నానని ఆయన వెల్లడించారు. పీసీసీ అధ్యక్ష పదవిని తనకు ఇవ్వాల్సిందిగా మాణికం ఠాగూర్ ను కోరానని జగ్గారెడ్డి వివరించారు. పీసీసీ చీఫ్ పదవి కోసం తెలంగాణ కాంగ్రెస్ గ్రూపులుగా విడిపోయినట్టు వస్తున్న వార్తలు నిజమేనని అన్నారు జగ్గారెడ్డి. అయితే పీసీసీ పదవి కోసం పోటీ పడుతున్నా అందరం కలిసే పని చేస్తామని చెప్పారు. హైకమాండ్ ఎవరిని ఎంపిక చేసినా తనకు అభ్యంతరం లేదన్నారు. కాని పార్టీలో ప్రక్షాళన మాత్రం జరగాలన్నారు. రేవంత్ రెడ్డికి పీసీసీ పగ్గాలు ఇచ్చినా తనకు అభ్యంతరం లేదన్నారు జగ్గారెడ్డి. పీసీసీ చీఫ్ గా ఉత్తమ్ కుమార్ రెడ్డి సమర్ధవంతంగానే పని చేశారని చెప్పారు. 

                   జీహెచ్ఎంసీ ఎన్నికల ఫలితాల్లో కాంగ్రెస్ వైఫల్యానికి నైతిక బాధ్యత వహిస్తూ ఉత్తమ్ కుమార్ రెడ్డి పీసీసీ అధ్యక్ష పదవికి ఇటీవలే రాజీనామా చేశారు. ఈ నేపథ్యంలో కొత్త పీసీసీ చీఫ్ ను ఎంపిక చేసేందుకు కాంగ్రెస్ అధిష్ఠానం ముమ్మర కసరత్తులు చేస్తోంది. తెలంగాణ కాంగ్రెస్ వ్యవహారాల ఇన్చార్జి మాణికం ఠాగూర్ ఒక్కొక్క నేతతో విడిగా మాట్లాడుతూ వారి అభిప్రాయాలు తెలుసుకుంటున్నారు. ఈ క్రమంలో కాంగ్రెస్ ఎమ్మెల్యే జగ్గారెడ్డి కూడా మాణికం ఠాగూర్ తో భేటీ అనంతరం మీడియాతో మాట్లాడారు. గాంధీభవన్ లోనే మకాం వేసిన మాణిక్కం ఠాగూర్ .. రాష్ట్రంలోని కాంగ్రెస్ నేతలతో మాట్లాడుతూ పీసీసీ అధ్యక్ష పదవిపై అభిప్రాయాలు తీసుకుంటున్నారు.