తెలంగాణలో కాంగ్రెస్ పరిస్థితి రోజు రోజుకి దిగజారి పోతున్న సమయంలో, బిజెపి బలం పెంచుకుంటూ వస్తుంది. రేవంత్ సైతం బిజెపిలోకి ముందు వెళ్లేందుకు చూసినా, ఎందుకో వెనక్కి తగ్గిపోయారు. ఇప్పుడు మాత్రం ఆయన సొంతంగా పార్టీని స్థాపించే ఆలోచనలో ఉన్నట్లుగా విశ్వసనీయ వర్గాల ద్వారా తెలుస్తోంది. ఆయనను సొంతంగా పార్టీ స్థాపించాలి అని కోరుతున్న వారి సంఖ్య పెరుగుతూ ఉండడం ఒక కారణం గా కనిపిస్తోంది. తెలంగాణలో బలమైన సామాజిక వర్గం గా ఉన్న రెడ్లు చాలా కాలంగా కొట్టు కోల్పోతున్నారు. అధికారంలో ఉన్న సమయంలో రెడ్డి సామాజిక వర్గానికి మంచి గుర్తింపు, ఆధిపత్యం ఉండేది. కానీ రాష్ట్ర విభజన తర్వాత రెడ్డి సామాజిక వర్గం రాజకీయంగా,  సామాజికంగా ఎన్నో రకాల ఇబ్బందులు ఎదుర్కొంటోంది. కొత్త రాష్ట్రం ఏర్పడిన తర్వాత రెడ్డి సామాజిక వర్గానికి చెందిన వారి వ్యాపారాలు చాలావరకు దెబ్బతిన్నాయి. దీంతో రేవంత్ రెడ్డిని హైలెట్ చేసి ఆయన ద్వారా తెలంగాణలో మరోసారి తమ సత్తా చాటుకోవాలని రెడ్డి సామాజిక వర్గం ఫిక్స్ అయినట్లుగా ప్రచారం జరుగుతోంది. 

మొన్నటి వరకు పిసిసి అధ్యక్ష పదవి కోసం రేవంత్ గట్టిగానే ప్రయత్నాలు చేశారు అలాగే పిసిసి చీఫ్ గా ఉన్న ఉత్తమ్ కుమార్ రెడ్డి గ్రేటర్ ఎన్నికలలో కాంగ్రెస్ ఓటమికి బాధ్యత తీసుకుంటూ తన పదవికి రాజీనామా చేశారు. ఆపదవి తనకు వస్తుందన్న నమ్మకం కూడా ఇప్పుడు రేవంత్ కు లేదు. అందుకే ప్రాంతీయ పార్టీ స్థాపించి అధికారంలోకి రావాలని రేవంత్ సైతం ప్రయత్నాలు మొదలుపెట్టినట్టు విశ్వసనీయ వర్గాల ద్వారా తెలుస్తోంది..