కాంగ్రెస్‌ పార్టీకి రాజీనామా చేసిన విజయశాంతి తాజాగా సోమవారం బీజేపీలో చేరారు. జాతీయ ప్రధాన కార్యదర్శి అరుణ్‌సింగ్‌ సమక్షంలో కాషాయ కండువా కప్పుకొన్నారు. ఈ సందర్భంగా ఆమె మాట్లాడుతూ కేసీఆర్‌పై విమర్శలు చేశారు. తెలంగాణతో పాటు త్వరలో జరగనున్న తమిళనాడు ఎన్నికల్లోనూ విజయశాంతితో ప్రచారం చేయించాలనే వ్యూహంలో కమలనాధులు ఉన్నారు. అంతకుముందు దేశ రాజధాని ఢిల్లీలో కేంద్ర హోం మంత్రి అమిత్‌ షాతో విజయశాంతి భేటీ అయ్యారు. ఢిల్లీ లోని ఆయన నివాసంలో కిషన్‌ రెడ్డి, బండి సంజయ్‌ లతో కలిసి వెళ్లి కేంద్ర హోం శాఖ మంత్రి అమిత్‌ షాను కలిశారు. ఈ సందర్భంగా ఆమె తెలంగాణ రాష్ట్ర రాజకీయాలపై, విషయాలపై అమిత్ షాతో చర్చించినట్లు విశ్వసనీయ వర్గాల సమాచారం.