మొన్నటి దుబ్బాక ఉపఎన్నిక గెలుపుతో మంచి ఊపుమీదున్న బీజేపీకి వెంటనే గ్రేటర్ ఎన్నికలు రావటం బాగా కలిసొచ్చింది. తనకు ఎదురే ఉండకూడదని కేసీయార్ అనుకుంటున్న సమయంలో కచ్చితంగా తామే కేసీయార్ కు ప్రత్యామ్నాయంగా ఉంటమానే నమ్మకాన్ని కమలంపార్టీ జనాల్లో కల్పించింది. అందుకనే జనాలంతా టీడీపీ, కాంగ్రెస్ ను వదిలేసి కమలంపార్టీని పట్టుకున్నారు. నిజానికి తెలంగాణాలో గడచిన ఆరేళ్ళల్లో టీఆర్ఎస్ ప్రభుత్వంపై రాజీలేని పోరాటాలు చేసిందంటే అది బీజేపీ మాత్రమే అని చెప్పాలి. టీడీపీ నేల మట్టమైపోయిన కారణంగా ఆ పార్టీని ఎవరు పట్టించుకోవటం లేదు. అలాగే కాంగ్రెస్ నేతల్లో ఇంకా లోపాయికారీగా చాలామంది కేసీయార్ తో సంబంధాలు కొనసాగిస్తున్నారనే జనాలు నమ్ముతున్నారు. కాబట్టి కాంగ్రెస్ కు మద్దతిచ్చినా ఉపయోగం ఉండదని అర్ధమపోయింది. అందుకనే కేసీయార్ పాలనపై పోరాటాలు చేస్తున్న బీజేపీకే జనాలు మద్దతిచ్చారు. ఇందులో భాగంగానే పార్లమెంటు ఎన్నికల్లో నాలుగు చోట్ల గెలిపించారు. ఈ మధ్య దుబ్బాక లో గెలిపించారు. తాజా ఎన్నికల్లో కూడా బీజేపీని 49 డివిజన్లలో గెలిపించారు.