టిఆర్ఎస్ పార్టీ వందకు పైగా స్థానాలను తాము సాధిస్తాము అంటూ చెబుతూ వచ్చింది. దీనికి తగ్గట్లుగానే కేసీఆర్ , కేటీఆర్ సైతం జిహెచ్ఎంసి ఎన్నికలపైనే పూర్తిస్థాయిలో దృష్టి పెట్టారు. ఎన్నో ఎత్తులు పై ఎత్తులు వేశారు. అయినా 58 స్థానాలు మాత్రమే గెలవగలిగింది. అయితే గెలిచిన ఆనందం కంటే , బిజెపి బాగా బలపడింది అనే ఆందోళన ఎక్కువగా టిఆర్ఎస్ పార్టీలో కనిపిస్తోంది. కాగా బిజెపి లో మాత్రం ఎక్కడ లేని హుషారు నెలకొంది. గతంలో తాము నాలుగు స్థానాలకే పరిమితమైనా, ఇప్పుడు దాదాపు 55 స్థానాలకు చేరుకోవడం, రాబోయే సార్వత్రిక ఎన్నికల్లోనూ బిజెపి తెలంగాణలో అధికారం దక్కించుకోవడం, దానికి గ్రేటర్ లో వచ్చిన ఫలితాలే నిదర్శనం అంటూ బిజెపి గొప్పగా చెప్పుకుంటోంది.

 టిఆర్ఎస్ ను ఎదుర్కొనేందుకు రాష్ట్రస్థాయి నాయకులే కాకుండా , బిజెపి అగ్రనాయకులు అందరూ.. గ్రేటర్ లో  పర్యటించడం ఇవన్నీ,  ఆ పార్టీకి కలిసి వచ్చాయి. దీనికి తోడు గ్రేటర్ పరిధిలో టీఆర్ఎస్ ప్రజా వ్యతిరేకత ఎదుర్కొంది అనే విషయం ఈ ఫలితాలతో స్పష్టం అవుతోంది. గ్రేటర్ ఎన్నికల్లో బిజెపి ఓడినా, ఆ పార్టీ నేతల్లో మాత్రం ఎక్కడ లేని ఉత్సాహాన్ని నింపగలగడం టిఆర్ఎస్ కు గెలిచిన ఆనందం లేకుండా చేయడం వంటి వ్యవహారాలతో బిజెపి సక్సెస్ సాధించినట్లుగానే కనిపిస్తోంది.