ప్రస్తుతం మేయర్ పీఠం ఆశిస్తున్న వారిలో విజయ రెడ్డి, కవితా రెడ్డి, సింధు రెడ్డి ఉన్నారు. ఈ ముగ్గురు గట్టిగానే మేయర్ పీఠం కోసం పోటీపడుతున్నారు. అయితే భారతి నగర్ డివిజన్ నుంచి గెలిచిన పి.వి.సింధు రెడ్డిని ముఖ్యమంత్రి కేసీఆర్ ప్రగతి భవన్ కు పిలిపించుకుని మరీ అభినందించడం తో ఆమె గ్రేటర్ మేయర్ పదవిలో కూర్చోబోతున్నారు అనే విషయం అందరికీ స్పష్టత వచ్చింది. అయితే స్పష్టంగా కేసీఆర్ ఈ విషయంపై క్లారిటీ ఇవ్వకపోవడంతో, ఈ స్థానం సంపాదించేందుకు చాలా మంది పోటీ పడుతున్నారు. 

టిఆర్ఎస్ నాయకుడు గోవర్ధన్ రెడ్డి భార్య వెంకటేశ్వర కాలనీ కార్పొరేటర్ కవిత రెడ్డి, మల్కాజ్ గిరి మాజీ ఎమ్మెల్యే చింతల కనకా రెడ్డి కోడలు విజయశాంతి, ఎంపీ కే.కేశవరావు కుమార్తె గద్వాల విజయలక్ష్మి, ఖైరతాబాద్ కార్పొరేటర్ విజయ రెడ్డి పేర్లు గట్టిగా వినిపిస్తున్నాయి. వీరంతా రెండు సార్లు గ్రేటర్ లో కార్పొరేటర్ గా గెలిచిన వారే. వీరు కాకుండా ప్రస్తుత మేయర్ బొంతు రామ్మోహన్ సతీమణి శ్రీదేవి పేరు కూడా గట్టిగానే వినిపిస్తోంది. కేసీఆర్ అనుగ్రహం ఎవరు పై ఉందో అనేది స్పష్టత లేదు. ఇక మేయర్ పీఠం విషయంలో ఎంఐఎం పార్టీ ఎటువంటి కండిషన్లు పెడుతుందో తెలియదు. ఆ పార్టీ నుంచి మేయర్ స్థానానికి పోటీ ఉండే అవకాశం కనిపిస్తోంది. లేకపోతే పదవీ కాలాన్ని చెరి సగం పంచుకునే అవకాశం కూడా ఉన్నట్టుగానే ప్రచారం జరుగుతోంది. ఏది ఏమైనా ఈరోజు మేయర్ అభ్యర్థి విషయంలో స్పష్టమైన క్లారిటీ వచ్చే అవకాశం కనిపిస్తోంది.