Marel - Veiting kauprétta

Marel hf. – Veiting kauprétta

Stjórn Marel hf. ákvað þann 6. júní 2019 að veita tilteknum starfsmönnum félagsins í lykilstöðum  kauprétti sem samsvarar 4,1 milljónum hluta í félaginu.

Kaupréttarsamningunum er ætlað að samtvinna hagsmuni starfsmanna og félagsins til lengri tíma. Skilmálar eru í samræmi við kaupréttarkerfi sem samþykkt var á aðalfundi Marel hf. þann 6. mars 2019 í samræmi við starfskjarastefnu félagsins sem samþykkt var á sama fundi.

Meginefni kaupréttarsamninganna er eftirfarandi:

• Veittur er kaupréttur á hlutabréfum á grunnverðinu EUR 3,70 á hlut.¹ Verðið skal leiðrétt fyrir arðgreiðslum sem kunna að verða ákveðnar frá útgáfudegi kaupréttanna.
• Ávinnslutími (e. vesting time) er þrjú ár frá úthlutun. Heimilt verður að nýta áunna kauprétti tvisvar á ári, í apríl og október eftir birtingu viðkomandi ársfjórðungsuppgjörs. Fyrsta nýtingartímabil mun hefjast þegar eftir birtingu þriðja ársfjórðungsuppgjörs árið 2022. Kaupréttarhafar geta frestað nýtingu á kaupréttum fram yfir uppgjör þriðja ársfjórðungs ársins 2023, þegar samningar renna út og falla þá ónýttir kaupréttir niður á sama tíma.
• Kaupréttur er aðeins gildur sé kaupréttarhafi í starfi hjá Marel (Marel hf. eða dótturfélaga þess) á nýtingardegi.

Heildarfjöldi útistandandi kauprétta sem Marel hf. hefur veitt starfsmönnum sínum nemur nú 19,6 milljónum hluta, sem nemur um 2,6% hlutafjár í félaginu, og er þá meðtalin þessi nýja úthlutun kauprétta. Heildarkostnaður félagsins vegna nýju samninganna á næstu þremur árum er áætlaður um 2,5 milljónir evra og er þá byggt á reiknilíkani Black-Scholes.

Fyrirhugað er að ganga frá samningum vegna úthlutunar á ofangreindum kaupréttum eftir birtingu uppgjörs annars ársfjórðungs, þann 24. júlí 2019.

¹ Kaupréttargengið er ákvarðað út frá útboðsgengi í hlutafjárútboði Marel hf. sem lauk þann 6. júní 2019.