Samkvæmt bráðabirgðatölum fyrir fyrsta ársfjórðung 2019 lítur út fyrir að EBITDA afkoma félagsins verði hagstæðari en stjórnendur gerðu ráð fyrir og að afkoman verði á bilinu 10,3 til 10,7 milljónir evra en til samanburðar var EBITDA afkoman á fyrsta ársfjórðungi 2018 7,3 milljónir evra.
Helstu ástæður fyrir betri afkomu milli ára eru aukin umsvif í flutningum í Trans-Atlantic og Færeyjum auk bættrar afkomu í rekstri félagsins í Noregi. Þá hefur afkoma í flutningsmiðlun verið betri en á sama tíma í fyrra og hagræðingaraðgerðir sem farið var í á síðasta ári hafa einnig skilað sér í bættri afkomu.
Í ljósi betri afkomu á fyrsta ársfjórðungi en gert var ráð fyrir og miðað við núverandi forsendur þrengir félagið bilið í afkomuspá sinni og gerir nú ráð fyrir EBITDA á bilinu 51 til 57 milljónir evra samanborið við 49 til 57 milljónir evra sem birt var samhliða ársuppgjöri fyrir árið 2018. Ekki þykir ástæða á þessum tímapunkti til að hækka efri mörk afkomuspárinnar þar sem enn ríkir nokkur óvissa í íslensku efnahagslífi, áhrif loðnubrests eru ekki að fullu komin fram sem og stöðunnar almennt á alþjóðlegum flutningamörkuðum.
Ofangreindar tölur taka ekki tillit til áhrifa reikningsskila staðals IFRS16 á EBITDA afkomu.
Félagið vinnur enn að uppgjöri ársfjórðungsins og afkoman og afkomuspá geta tekið breytingum í uppgjörsferlinu.
Nánari upplýsingar veitir Árni Sigurðsson í síma 825 7319 og á netfanginu investors@eimskip.is