حملے میں امریکی حمایت یافتہ عرب ریاستیں ملوث ہیں، خامنائی
WEB DESK
ایرانی سپریم لیڈر آیت اللہ خامنائی نے شہر اہواز میں فوجی پریڈ پر ہوئے حملے کا الزام امریکی حمایت یافتہ عرب ریاستوں پر عائد کیا ہے۔ خامنائی نے ملکی سیکیورٹی افواج کو حکم دیا ہے کہ وہ اس حملے کے ذمہ داروں کو کیفر کردار تک پہنچانےکے لیے بھر پور کارروائی کریں۔ ہفتے کو کیے گئے اس حملے میں پاسداران انقلاب کے بارہ سپاہیوں سمیت کل ٢٩ افراد ہلاک ہوئے جبکہ ساٹھ افراد زخمی ہیں۔ فوجی پریڈ پر حملے کے تناظر میں ایرانی صدر حسن روحانی نے بھی شدید رد عمل کا اظہار کیا ہے۔ انہوں نے اپنی ویب سائٹ پر ایک بیان میں کہا کہ ایران پر اس حملے کے نتائج سنگین ہوں گے۔
حملے کی ذمہ داری جہادی گروپ اسلامک اسٹیٹ نے قبول کر لی
ایرانی شہر اہواز میں ہفتے کے دن فوجی پریڈ پر حملے کی ذمہ داری جہادی گروپ اسلامک اسٹیٹ نے قبول کر لی ہے۔ ایرانی وزارت خارجہ نے اس کارروائی کا الزام ’غیر ملکی عناصر‘ پر عائد کیا تھا۔ اس حملے میں انتیس افراد ہلاک ہو گئے ہیں۔ ایرانی حکام کے مطابق ہلاک شدگان میں سے نصف کا تعلق ایرانی ریوولوشنری گارڈز سے تھا۔ بتایا گیا ہے کہ چار مسلح حملہ آوروں نے یہ کارروائی اس وقت کی، جب فوجی پریڈ کر رہے تھے۔ ادھر روسی صدر ولادیمیر پوٹن نے اس حملے کی مذمت کرتے ہوئے انسداد دہشت گردی کی کارروائیوں کی خاطر تہران حکومت کو بھرپور تعاون کا یقین دلایا ہے۔ داعش نے اس کارروائی کی ذمہ داری قبول کر لی ہے تاہم اس دعویٰ کی صداقت کا علم نہیں ہو سکا ہے