Dinamalar

சென்னை : சட்டசபையில் நேற்று, 2018 - 19ம் நிதி ஆண்டுக்கான, தமிழக பட்ஜெட்டை, துணை முதல்வர், பன்னீர்செல்வம் தாக்கல் செய்தார். இதில், அரசின் வருவாய் பற்றாக்குறை, 17 ஆயிரத்து, 490 கோடி ரூபாயாக அதிகரிக்கும் என, தெரிவிக்கப்பட்டு உள்ளது. அரசுக்கு கூடுதல் செலவு ஏற்பட்டுள்ளதால், கடன் சுமையும், 3.56 லட்சம் கோடி ரூபாயாக உயர்கிறது.

தமிழக அரசின், 2018 - 19ம் ஆண்டிற்கான பட்ஜெட் அம்சங்கள்:

சமீபத்தில் வழங்கப்பட்டுள்ள, அரசு ஊழியர்களுக்கான ஊதிய உயர்வை கணக்கிட்டு, 2018 - 19ம் நிதி ஆண்டிற்கான, பட்ஜெட் மதிப்பீடுகளில், சம்பளம் மற்றும் படிகளுக்காக, 52 ஆயிரத்து, 171 கோடி ரூபாய்; ஓய்வூதியம் மற்றும் இதர ஓய்வுகாலப் பலன்களுக்காக, 25 ஆயிரத்து, 362 கோடி ரூபாய், ஒதுக்கீடு செய்யப்பட்டுள்ளது.

ரூ.1.76 லட்சம்

எனவே, 2018 - 19ம் ஆண்டில், அரசின் மொத்த வருவாய் வரவு, 1.76 லட்சம் கோடியாகவும், வருவாய் செலவினங்கள், 1.93 லட்சம் கோடி ரூபாயாகவும் இருக்கும். வருவாய் பற்றாக்குறை, 17 ஆயிரத்து, 490 கோடி ரூபாயாக இருக்கும் என, மதிப்பிடப்பட்டுள்ளது. மூலதன செலவினம், 28 ஆயிரத்து, 283 கோடியாகவும், நிதி பற்றாக்குறை, 44 ஆயிரத்து, 481 கோடி ரூபாயாகவும் இருக்கும். இது, மாநிலத்தின் மொத்த உற்பத்தி மதிப்பில், 2.79 சதவீதம். அனுமதிக்கப்பட்ட நிகரக் கடன், 47 ஆயிரத்து, 888 கோடி ரூபாயாக இருந்தாலும், வரும் நிதியாண்டில், 43 ஆயிரத்து, 962 கோடி ரூபாய் வரை மட்டும், கடன் பெற உத்தேசிக்கப்பட்டுள்ளது.

இதனால், 2019 மார்ச், 31ல், அரசின் நிகர நிலுவைக் கடன், 3.56 லட்சம் கோடி ரூபாயாக உயரும். மாநில மொத்த உற்பத்தி மதிப்பில், இந்த நிலுவைக் கடன் அளவு, 22.29 சதவீதமாகும். எனினும், அனுமதிக்கப்பட்ட, 25 சதவீத அளவிற்கு உட்பட்டே, கடன் அளவு இருக்கும்.நலத் திட்டங்களை செயல்படுத்துவதில், மக்களுக்கான எதிர்பார்ப்புகள் கூடியுள்ளன. நிதி ஆதாரங்களிலும், நிதி நிலையிலும், சிரமமான சூழ்நிலை நிலவி வருகிறது. எனினும், கரு மேகங்களுக்கு இடையே தென்படும், வெள்ளிக்கீற்று மின்னலைப் போன்று, பொருளாதார வளர்ச்சிக்கான அறிகுறிகள் தென்பட ஆரம்பித்துள்ளன.