Dinamalar

கர்நாடக சட்டசபைக்கு, விரைவில் தேர்தல் நடைபெற உள்ளதால், அம்மாநில முதல்வர், சித்தராமையா, அரசியல் தகிடுதத்த வேலைகளை துவங்கி விட்டார். காவிரி பிரச்னையில், தமிழகம், அனைத்து கட்சி கூட்டம் நடத்தியது போல, கர்நாடகாவிலும், 7ம் தேதி, அனைத்து கட்சி கூட்டத்திற்கு ஏற்பாடு செய்துள்ளார். அதில், காவிரி மேலாண்மை வாரியத்திற்கு எதிராக, தீர்மானம் நிறைவேற்ற திட்டமிட்டுள்ளார். இது தொடர்பாக, தமிழக முதல்வர் பழனிசாமி, இன்று எதிர்க்கட்சி தலைவர், ஸ்டாலினுடன், அவசர ஆலோசனை நடத்த உள்ளார்.

காவிரி நதி நீர் பிரச்னையில், பிப்., 16ல், உச்ச நீதிமன்றம் இறுதி தீர்ப்பு வழங்கியது. அதில், காவிரி நடுவர் மன்றம், தமிழகத்திற்கு நிர்ணயித்திருந்த நீரின் அளவில், 14.75 டி.எம்.சி.,யை குறைத்து, 177.25 டி.எம்.சி., வழங்க உத்தரவிட்டது.

தீர்ப்பு:
இது, தமிழகத்திற்கு பாதகமாக இருந்தாலும், 'காவிரி மேலாண்மை வாரியத்தை, மத்திய அரசு, ஆறு வாரங்களுக்குள் அமைக்க வேண்டும்' என, உச்ச நீதிமன்றம் தீர்ப்பளித்தது.இதையடுத்து, பிப்., 22ல், தமிழக அரசு சார்பில், சென்னை, தலைமை செயலகத்தில், முதல்வர் பழனிசாமி தலைமையில், அனைத்து கட்சி கூட்டம் நடந்தது. அதில், அனைத்து கட்சி தலைவர்களும், டில்லி சென்று, பிரதமரை சந்தித்து, காவிரி மேலாண்மை வாரியம் அமைக்க வலியுறுத்துவது என, முடிவு செய்யப்பட்டது. அதைத் தொடர்ந்து, பிரதமரை சந்திக்க, தமிழக அரசு சார்பில், நேரம் கேட்கப்பட்டு உள்ளது; இதுவரை, ஒதுக்கப்படவில்லை.

கர்நாடக மாநிலத்தில், தற்போது காங்கிரஸ் ஆட்சி நடந்து வருகிறது. இதன் பதவி காலம், மே மாதம் நிறைவு பெறுகிறது. எனவே, விரைவில் சட்டசபை தேர்தல் வர உள்ளது. ஆட்சியை தக்க வைத்துக்கொள்ள, காங்கிரஸ் போராடி வருகிறது. எனவே, 'காவிரி மேலாண்மை வாரியம் அமைய விட மாட்டோம்' என, அம்மாநில முதல்வர், சித்தராமையா கூறி உள்ளார்.