Dinamalar

திரிபுரா சட்டசபைத் தேர்தல் முடிவுகள், நாளை வெளியாகவுள்ள நிலையில், மார்க்சிஸ்ட் கட்சிக்குள் ஏற்கனவே நடந்துவரும், யெச்சூரி - பிரகாஷ் கராத் இடையிலான மோதல், அடுத்த கட்டத்தை எட்டலாம் என தெரிகிறது.

வட கிழக்கு மாநிலமான திரிபுராவில், முதல்வர் மாணிக் சர்க்கார் தலைமையிலான, மார்க்சிஸ்ட் கம்யூனிஸ்ட் ஆட்சி நடக்கிறது. இம்மாநில சட்டசபைத் தேர்தல், சமீபத்தில் நடந்தது. இதன் முடிவுகள் நாளை வெளியாகஉள்ளன. இதில், மாணிக் சர்க்கார் தலைமையிலான ஆட்சியே நீடிக்குமா என்ற எதிர்பார்ப்பு நிலவுகிறது.

தலைவலி:

தேர்தல் முடிவுகள் சாதகமாக வந்து, தங்கள் ஆட்சியை மீண்டும் தக்க வைத்தாலும், மார்க்சிஸ்ட் கட்சிக்குள் புதிய தலைவலி காத்துள்ளது. இது குறித்து, டில்லியில் தகவலறிந்த வட்டாரங்கள் கூறியதாவது:

தேர்தல் வெற்றியை கருத்தில் வைத்து, காங்கிரசுடன், தேர்தல் கூட்டணி ஏற்படுத்தும் வகையில், பொதுச் செயலர், சீதாராம் யெச்சூரி எடுத்த முயற்சிகளை, மூத்த தலைவர், பிரகாஷ் கராத் சமீபத்தில் முறியடித்தார். இந்த பிரச்னை குறித்து மார்க்சிஸ்ட் கட்சிக்குள் பெரும் குழப்பம் நீடிக்கிறது. ஏப்ரலில் நடக்கவுள்ள, கட்சியின் அகில இந்திய மாநாடு வரை, இந்த சிக்கலுக்கு தெளிவு பிறக்க வழியில்லை.

இந்நிலையில் தான், திரிபுரா மாநில தேர்தல் முடிவுகள் வெளியாகவுள்ளன. இதிலும் ஒரு பிரச்னை வெடிக்க காத்திருக்கிறது. இதற்கு காரணம், அம்மாநிலத்தின் ஒரே ஒரு ராஜ்யசபா சீட். தற்போது ராஜ்யசபா, எம்.பி.,யாக உள்ளவர் ஜர்னதாஸ் பைதியா. இவரது பதவிக் காலம்,

2022ம் ஆண்டு வரை உள்ளது. ஆனாலும், நடந்து முடிந்த சட்டசபை தேர்தலில், இவருக்கு, 'சீட்' தரப்பட்டு, வேட்பாளராக களம் இறக்கப்பட்டார்.

தேர்தலில், எம்.எல்.ஏ., வாக வெற்றி பெற்றால், அவர், எம்.பி., பதவியை ராஜினாமா செய்து விடுவார். அவரது இடம் காலியானதும், அதில், கட்சியின் முக்கிய தலைவர்களில் யாராவது ஒருவர் நிறுத்தப்பட்டு, எம்.பி.,யாக்கப்படுவார் என்பதே, இதன் பின்னணி. அந்த முக்கிய தலைவர்கள், சீதாராம் யெச்சூரியும், பிருந்தா காரத்தும் தான். யெச்சூரி ஏற்கனவே இரண்டு முறை ராஜ்யசபா, எம்.பி.,யாக பதவி வகித்து விட்டார். இவரை மூன்றாவது முறையாக, எம்.பி.,யாக அனுப்பி வைக்க, காங்கிரஸ் முன்வந்தது. ராகுலே முயற்சி செய்தும், அது நடக்கவில்லை.

'மார்க்சிஸ்ட் கட்சியில், இரண்டு முறைக்கு மேல், யாரும் ராஜ்யசபா, எம்.பி.,யாக பதவியில் இருக்கக்கூடாது' என, விதி இருப்பதாக கூறி, அந்த வாய்ப்பை மார்க்சிஸ்ட் மறுத்துவிட்டது.

'ஜோதிபாசுவுக்கு பிரதமர் வாய்ப்பு வந்தபோது, விதிகளை காரணம் காட்டி, தவிர்த்ததை போல, யெச்சூரிக்கு வந்த இந்த வாய்ப்பை பயன்படுத்தாததும் வரலாற்றுப் பிழையே' என, கட்சிக்குள், அவரது ஆதரவாளர்கள் முணுமுணுக்கின்றனர்.

பார்லிமென்ட்டில் இடதுசாரிகளின் பலம் குறைந்து, முக்கிய ஆளுமைகள் யாரும் இல்லாமல் இருப்பதால், திரிபுராவிலிருந்து, யெச்சூரியை அனுப்ப, மாணிக் சர்க்காரும் விரும்புவதாக தகவல் உள்ளது. ஆனால், இதை, பிரகாஷ் கராத் தலைமையிலான கேரள, 'லாபி' கடுமையாக எதிர்க்கிறது.

ராஜினாமா:

திரிபுரா சீட்டை, ராஜ்ய சபா, எம்.பி.,யாக ஒரே ஒருமுறை மட்டுமே இருந்த, பிருந்தா காரத்திற்கே வழங்க வேண்டுமென, இந்த தரப்பினர் கூறி வருகின்றனர். இந்நிலையில், ஒரு வேளை, ஜர்னதாஸ் பைதியா, சட்டசபை தேர்தலில் வெற்றி பெற்றால், அவர், எம்.பி., பதவியை ராஜினாமா செய்ததும், மார்க்சிஸ்ட் கட்சிக்குள் புயல் வீசும் என, எதிர்பார்க்கப்படுகிறது. இவ்வாறு அந்த வட்டாரங்கள் தெரிவித்தன.